இஸ்லாமியர்களின் முக்கியப் பண்டிகையான தியாகத் திருநாள் எனப்படும் பக்ரீத் (ஈத்-உல்-அதா) பண்டிகை இன்னும் சில தினங்களில் கொண்டாடப்பட உள்ள நிலையில், அஸ்ஸாம் மாநிலத்தைச் சேர்ந்த பல ஈத்கா கமிட்டிகள் அம்மாநில இஸ்லாமிய மக்களுக்கு ஒரு முக்கிய வேண்டுகோளை விடுத்துள்ளன. இப்பண்டிகை காலத்தில் பசுக்களை குர்பானி (பலியிடுதல்) கொடுப்பதைத் தவிர்க்குமாறும், சமூகத்தில் மத நல்லிணக்கத்தைப் பேணிப் பாதுகாக்குமாறும் அவை கேட்டுக் கொண்டுள்ளன. ஏறத்தாழ 35 சதவீத இஸ்லாமிய மக்கள் தொகையைக் கொண்ட அஸ்ஸாம் மாநிலத்தில், அம்மாநில முதலமைச்சர் ஹிமந்த பிஸ்வ சர்மா சனிக்கிழமை அன்று விடுத்த கோரிக்கையைத் தொடர்ந்து இந்த ஈத்கா கமிட்டிகள் இந்த கூட்டு அறிவிப்பை வெளியிட்டுள்ளன.
துப்ரி மற்றும் ஹோஜாய் கமிட்டிகளின் அமைதிக்கான அறிக்கை
அஸ்ஸாமில் இஸ்லாமியர்கள் பெரும்பான்மையாக வாழும் மாவட்டமான துப்ரியில் உள்ள 'துப்ரி டவுன் ஈத்கா கமிட்டி' வெள்ளிக்கிழமை வெளியிட்ட அறிக்கையில், பக்ரீத் பண்டிகையை அமைதியாகவும், சட்டத்திற்குட்பட்டும், சமூகப் பொறுப்புணர்வோடும் கொண்டாடுமாறு அப்பகுதி மக்களைக் கேட்டுக்கொண்டுள்ளது. பக்ரீத் பண்டிகையின் போது விலங்குகளை பலியிடுவது தொடர்பாக அஸ்ஸாம் அரசு வகுத்துள்ள சட்டப்பூர்வ வழிமுறைகளை இஸ்லாமியப் பெருமக்கள் கண்டிப்பாகப் பின்பற்ற வேண்டும் என அந்த அறிக்கை வலியுறுத்துகிறது.
அஸ்ஸாம் கால்நடை பாதுகாப்புச் சட்டத்தின் கீழ் பசு வதைக்கு தடை விதிக்கப்பட்டுள்ளதைச் சுட்டிக்காட்டியுள்ள கமிட்டி, இந்த விதியை மீறுபவர்கள் மீது சிறைத்தண்டனை மற்றும் அபராதம் உள்ளிட்ட கடுமையான சட்ட நடவடிக்கைகள் பாயும் என எச்சரித்துள்ளது. இதேபோல், ஹோஜாய் டவுன் ஈத்கா கப்ரிஸ்தான் கமிட்டியும் ஒரு அறிக்கையை வெளியிட்டு, விலங்குகளை பலியிடும் போது மத உணர்வுகளுக்கும் சமூக நல்லிணக்கத்திற்கும் எவ்வித பங்கமும் நேராதவாறு நடந்துகொள்ள வேண்டும் என்றும், இஸ்லாத்தில் பசுவை பலியிடுவது கட்டாயமாக்கப்படவில்லை என்றும் தெளிவுபடுத்தியுள்ளது.
சுகாதாரப் பராமரிப்பும் சமூக வலைதளக் கட்டுப்பாடுகளும்
ஈத்கா கமிட்டி தனது அறிக்கையில், விலங்குகளை குர்பானி கொடுக்கும் நிகழ்வுகளை அதற்கென ஒதுக்கப்பட்ட குறிப்பிட்ட இடங்களில் மட்டுமே செய்ய வேண்டும் என்றும், பொது இடங்களில் தூய்மையையும் நாகரிகத்தையும் பேண வேண்டும் என்றும் பொதுமக்களைக் கேட்டுக்கொண்டுள்ளது. மேலும், விலங்குகளைப் பலியிடும் புகைப்படங்கள் அல்லது வீடியோக்களை சமூக வலைதளங்களில் எக்காரணம் கொண்டும் பதிவிடவோ, பகிரவோ வேண்டாம் என குடிமக்களுக்குக் கடுமையான அறிவுறுத்தல் வழங்கப்பட்டுள்ளது. இத்தகைய பதிவுகள் மற்ற சமூகத்தினரின் உணர்வுகளைக் காயப்படுத்தக்கூடும் என்றும், இதனால் சமூக அமைதி சீர்குலைய வாய்ப்புள்ளது என்றும் கமிட்டி எச்சரித்துள்ளது. பக்ரீத் பண்டிகை என்பது தியாகம், கருணை மற்றும் ஒற்றுமையின் அடையாளம் என்பதால், சமூகத்தின் அனைத்துத் தரப்பு மக்களும் அமைதி, சகோதரத்துவம் மற்றும் பரஸ்பர மரியாதையை நிலைநிறுத்த வேண்டும் என்றும், பண்டிகை அமைதியாக நடைபெற ஏதுவாக மாவட்ட நிர்வாகம் மற்றும் காவல்துறையினருக்கு முழு ஒத்துழைப்பு நல்க வேண்டும் என்றும் வேண்டுகோள் விடுக்கப்பட்டுள்ளது.
முதலமைச்சர் ஹிமந்த பிஸ்வ சர்மாவின் பாராட்டும் அழைப்பும்
இதுகுறித்து அஸ்ஸாம் முதலமைச்சர் ஹிமந்த பிஸ்வ சர்மா தனது எக்ஸ் (X) வலைதளப் பக்கத்தில், இந்துக்களின் மத உணர்வுகளுக்கு மதிப்பளித்தும், நாட்டின் சட்டத்தைப் பின்பற்றியும் பசு வதையைத் தவிர்க்குமாறு துப்ரி டவுன் ஈத்கா கமிட்டி மக்களுக்கு விடுத்துள்ள கோரிக்கையைப் பாராட்டிப் பதிவிட்டுள்ளார். பல்வேறு கமிட்டிகளின் அழைப்பைத் தொடர்ந்து துப்ரி கமிட்டியும் இந்த முடிவை எடுத்துள்ளது மகிழ்ச்சி அளிப்பதாகக் குறிப்பிட்டுள்ள அவர், மாநிலத்தில் உள்ள அனைத்து ஈத்கா கமிட்டிகளும் முன்வந்து இந்த ஆண்டு பக்ரீத் பண்டிகையைப் பசு வதை இல்லாத பண்டிகையாக மாற்ற வேண்டும் என்று அழைப்பு விடுத்துள்ளார்.
இதுதொடர்பாக துப்ரி டவுன் ஈத்கா கமிட்டியின் தலைவர் செய்தியாளர்களிடம் பேசுகையில், "பண்டிகையின் போது பசுக்களை பலியிட வேண்டாம் என ஒருமனதாக முடிவெடுத்து, எங்கள் இஸ்லாமிய சகோதரர்களுக்கும் வேண்டுகோள் விடுத்துள்ளோம். எந்தவொரு உயிரையும் பலியிடுவது மட்டும் நமது மார்க்கத்தின் நோக்கம் அல்ல; இந்த ஈத் நன்னாளில் நமக்குள் இருக்கும் பொறாமை போன்ற தீய குணங்களையே நாம் பலியிட வேண்டும். நமது மத வழிபாட்டு முறைகளால் மற்ற மதத்தினரின் உணர்வுகள் ஒருபோதும் புண்படக் கூடாது" என்று மிக உருக்கமாகத் தெரிவித்துள்ளார்.