ஆந்திரப் பிரதேச மாநிலத்தின் ஒரே மற்றும் நிரந்தரத் தலைநகராக அமராவதியை அங்கீகரிக்கும் வரலாற்றுச் சிறப்புமிக்க மசோதா, இன்று மாநிலங்களவையில் குரல் வாக்கெடுப்பு மூலம் ஒருமனதாக நிறைவேற்றப்பட்டது. முன்னதாக, நேற்று மக்களவையில் இந்த மசோதா நிறைவேற்றப்பட்ட நிலையில், இன்று நாடாளுமன்றத்தின் இரு அவைகளிலும் ஒப்புதல் பெற்று சட்ட வடிவம் பெற்றுள்ளது. ஆந்திரப் பிரதேச மறுசீரமைப்புச் சட்டம் 2014-ல் திருத்தம் மேற்கொள்வதற்காகக் கொண்டு வரப்பட்ட இந்த மசோதா மீதான விவாதத்தில் பங்கேற்றுப் பேசிய மத்திய உள்துறை இணை அமைச்சர் நித்யானந்த ராய், இது வெறும் நிர்வாக முடிவு மட்டுமல்ல, ஆந்திர மக்களின் பெருமை மற்றும் ஜனநாயக நம்பிக்கையை மீட்டெடுக்கும் அடையாளம் என்று பெருமிதத்துடன் குறிப்பிட்டார்.
இந்த விவாதத்தில் கலந்துகொண்ட மத்திய அமைச்சர் ராம்மோகன் நாயடு, இந்த மசோதா ஆந்திர மக்களின் நீண்ட கால எதிர்பார்ப்புக்குப் தெளிவான விடையளித்துள்ளதாகத் தெரிவித்தார். இது ஆந்திராவின் எதிர்காலத்தையும் சுயமரியாதையையும் மறுவரையறை செய்யும் ஒரு உணர்வுப்பூர்வமான தருணம் என்றும் அவர் நெகிழ்ச்சியுடன் குறிப்பிட்டார். மாநிலப் பிரிவினையின் போது ஏற்பட்ட கசப்பான அனுபவங்களுக்குப் பிறகு, தற்போது கிடைத்துள்ள இந்த அங்கீகாரம் உலகெங்கும் வாழும் தெலுங்கு சமூகத்தினருக்கு ஒரு மிகப்பெரிய வெற்றியாகப் பார்க்கப்படுகிறது. இதன் மூலம் அமராவதி நகரை உலகத்தரம் வாய்ந்த தலைநகராக மாற்றும் பணிகள் இனி வேகம் எடுக்கும் என எதிர்பார்க்கப்படுகிறது.