தமிழக சட்டமன்றத் தேர்தலில் 108 இடங்களை வென்று தனிப்பெரும் கட்சியாக உருவெடுத்துள்ள தமிழக வெற்றிக் கழகத்தின் தலைவர் விஜய், இரண்டு தொகுதிகளில் போட்டியிட்டு இரண்டிலும் வெற்றி பெற்றுள்ளார். அக்கட்சியின் சட்டமன்றக் குழுத் தலைவராகத் தேர்ந்தெடுக்கப்பட்ட விஜய், ஆட்சி அமைக்க உரிமை கோரி ஆளுநருக்கு ஏற்கனவே மின்னஞ்சல் மூலம் கடிதம் அனுப்பியிருந்தார். அதில் தவெக 35% வாக்குகளைப் பெற்றுள்ளதைச் சுட்டிக்காட்டி தன்னை ஆட்சி அமைக்க அழைக்குமாறு கோரிக்கை விடுத்திருந்தார். இருப்பினும், ஆட்சி அமைக்க ஆதரவு அளிக்கும் உறுப்பினர்களின் முழுமையான விவரங்களை அளிக்குமாறு ஆளுநர் தரப்பிலிருந்து அறிவுறுத்தப்பட்டதாகத் தகவல்கள் வெளியாகின.
ஆளுநரின் நிபந்தனையும் நேரில் நடைபெற்ற சந்திப்பும்
இது தொடர்பாகத் தனியார் தொலைக்காட்சிக்கு அளித்த பேட்டியில், பெரும்பான்மைக்குத் தேவையான 118 எம்எல்ஏக்களின் ஆதரவு குறித்த விவரங்கள் முறைப்படி தெரிவிக்கப்பட வேண்டும் என்றும், அரசியலமைப்பின் அடிப்படையிலேயே தனது செயல்பாடுகள் அமையும் என்றும் ஆளுநர் ராஜேந்திர அர்லேகர் தெளிவுபடுத்தியுள்ளார். இந்தச் சூழலில், இன்று மாலை 3.30 மணியளவில் ஆளுநர் மாளிகைக்கு நேரில் சென்ற விஜய், ஆளுநரைச் சந்தித்து ஆட்சி அமைக்க உரிமை கோரும் கடிதத்தைச் சமர்ப்பித்தார். இருப்பினும், அந்தக் கடிதத்தில் பெரும்பான்மையை நிரூபிப்பதற்கான போதிய உறுப்பினர்களின் ஆதரவு விவரங்கள் இடம்பெறவில்லை எனக் கூறப்படுகிறது.
கூட்டணிக் கட்சிகளின் நிலைப்பாடும் நிலவும் இழுபறியும்
தற்போது தவெக வசம் 108 இடங்கள் உள்ள நிலையில், 5 இடங்களைக் கொண்டுள்ள காங்கிரஸ் கட்சி மட்டுமே தனது ஆதரவை இன்று உறுதி செய்துள்ளது. மீதமுள்ள இடங்களுக்கு விசிக, சிபிஐ மற்றும் சிபிஎம் ஆகிய கட்சிகளின் ஆதரவை விஜய் கோரியிருந்தாலும், தலா 2 இடங்களை வைத்துள்ள அக்கட்சிகள் இன்னும் தங்களது இறுதி முடிவை அறிவிக்கவில்லை. இந்தக் கட்சிகளின் ஆதரவு கிடைத்தால் மட்டுமே விஜய்யால் பெரும்பான்மையை நிரூபிக்க முடியும் என்ற நிலை உள்ளது. போதிய ஆதரவு கடிதங்கள் சமர்ப்பிக்கப்படாததால், சென்னை நேரு உள்விளையாட்டு அரங்கில் நாளை (மே 7) நடைபெறவிருந்த பதவியேற்பு விழா திட்டமிட்டபடி நடக்குமா என்பதில் தற்போது கேள்விக்குறி எழுந்துள்ளது.