தமிழக சட்டப்பேரவைத் தேர்தல் முடிவுகளில் 108 இடங்களைப் பெற்றுத் தனிப்பெரும் கட்சியாக உருவெடுத்த போதிலும், ஆட்சி அமைக்கத் தேவையான 118 இடங்கள் கிடைக்காமல் தவெக திணறி வந்தது. காங்கிரஸ் (5 இடங்கள்) மற்றும் இடதுசாரி கட்சிகள் (4 இடங்கள்) என அடுத்தடுத்து ஆதரவு வழங்கிய போதிலும், மெஜாரிட்டியை எட்ட இன்னும் இரண்டு இடங்கள் தேவைப்பட்டன. இந்த இக்கட்டான சூழலில், ஒட்டுமொத்த தமிழகமும் எதிர்பார்த்துக் காத்திருந்த விடுதலைச் சிறுத்தைகள் கட்சியின் ஆதரவு தற்போது தவெக-வுக்குக் கிடைத்துள்ளது. தனது இரண்டு சட்டமன்ற உறுப்பினர்களின் ஆதரவை எந்தவித நிபந்தனையும் இன்றி வழங்குவதாக விசிக தலைவர் தொல். திருமாவளவன் அதிகாரப்பூர்வமாகக் கடிதம் அளித்துள்ளார். இதன் மூலம் தவெக-வின் பலம் 118 ஆக உயர்ந்து, ஆட்சி அமைப்பதற்கான பெரும்பான்மை உறுதி செய்யப்பட்டுள்ளது.
ஜனநாயகத்தை நிலைநாட்ட விசிக எடுத்த முக்கிய முன்னெடுப்பு
தமிழக மக்களுக்கு ஒரு நிலையான மற்றும் ஜனநாயக முறையிலான ஆட்சி கிடைக்க வேண்டும் என்ற உன்னத நோக்கத்தில் இந்த ஆதரவை வழங்குவதாகத் திருமாவளவன் தனது கடிதத்தில் குறிப்பிட்டுள்ளார். முன்னதாக, இடதுசாரி தலைவர்கள் மற்றும் திமுக தலைவர் ஸ்டாலினுடன் அவர் தீவிர ஆலோசனையில் ஈடுபட்டிருந்த நிலையில், இறுதியில் தவெக-வுக்குக் கைகொடுக்க அவர் முன்வந்துள்ளார். இந்த ஆதரவு குறித்து தவெக எம்எல்ஏ ஆதவ் அர்ஜுனா பேசுகையில், "ஆதரவு அளித்த அனைத்துத் தோழர்களுக்கும் எங்களது நெஞ்சார்ந்த நன்றிகள்; தமிழக மக்களின் பேராதரவுடன் எங்கள் தலைவர் முதல்வராகப் பொறுப்பேற்பார், ஜனநாயகம் காக்கப்படும்" என நெகிழ்ச்சியுடன் தெரிவித்தார்.
ஆளுநரின் கெடுபிடியும் எட்டப்பட்ட இலக்கும்
முன்னதாக, 112 இடங்களுடன் ஆட்சி அமைக்க உரிமை கோரி ஆளுநர் அர்லேகரை விஜய் சந்தித்தபோது, 118 உறுப்பினர்களின் பட்டியலை அளித்தால் மட்டுமே அடுத்தகட்ட நடவடிக்கை எடுக்கப்படும் என ஆளுநர் திட்டவட்டமாகத் தெரிவித்திருந்தார். இதனால் வெள்ளிக்கிழமை முழுவதும் பெரும் அரசியல் பரபரப்பு நிலவியது. இந்திய கம்யூனிஸ்ட் மற்றும் மார்க்சிஸ்ட் கம்யூனிஸ்ட் கட்சிகள் தங்களது ஆதரவுக் கடிதங்களை சிடிஆர் நிர்மல்குமாரிடம் வழங்கியதைத் தொடர்ந்து, விஜய் நேரில் சென்று அவர்களுக்கு நன்றி தெரிவித்தார். தற்போது விசிக-வின் ஆதரவும் சேர்ந்துள்ளதால், தமிழகத்தின் புதிய முதல்வராக விஜய் பதவியேற்பதற்கான அனைத்து சட்டப்பூர்வ தடைகளும் நீங்கியுள்ளன.