தமிழகச் சட்டமன்றத் தேர்தலில் திமுக தலைமையிலான மதச்சார்பற்ற முற்போக்குக் கூட்டணியில் இடம்பெற்றுள்ள மதிமுக, தனக்கு ஒதுக்கப்பட்ட நான்கு தொகுதிகளிலும் உதயசூரியன் சின்னத்திலேயே போட்டியிட முடிவு செய்துள்ளது. முன்னதாக, கட்சியின் பதிவைத் தக்கவைக்கும் நோக்கில் மூன்று தொகுதிகளில் உதயசூரியன் சின்னத்திலும், சீர்காழி (தனி) தொகுதியில் மட்டும் தனிச் சின்னத்திலும் போட்டியிட ஒப்பந்தம் கையெழுத்தானது. ஆனால், தற்போது ஏற்பட்டுள்ள அரசியல் மாற்றங்கள் மற்றும் கள நிலவரங்களைக் கருத்தில் கொண்டு, சீர்காழி தொகுதியிலும் மதிமுக வேட்பாளர் ரா.செந்தில்செல்வன் உதயசூரியன் சின்னத்திலேயே போட்டியிடுவார் என அக்கட்சியின் பொதுச்செயலாளர் வைகோ அதிகாரப்பூர்வமாக அறிவித்துள்ளார்.
சீர்காழி தொகுதியில் மேற்கொள்ளப்பட்ட கள ஆய்வுகளில், தனிச் சின்னத்தில் போட்டியிடுவதை விட உதயசூரியன் சின்னத்தில் போட்டியிடுவது வெற்றி வாய்ப்பை உறுதி செய்யும் என திமுக தரப்பில் வலியுறுத்தப்பட்டதால் இந்த முடிவு எடுக்கப்பட்டதாக மதிமுக வட்டாரங்கள் தெரிவிக்கின்றன. வைகோவின் இந்த முடிவை வரவேற்றுள்ள முதல்வர் மு.க.ஸ்டாலின், "ஆருயிர் அண்ணன் வைகோ பெருந்தன்மையோடு எடுத்துள்ள இந்த முடிவை நன்றியோடு வரவேற்கிறேன்" எனத் தனது எக்ஸ் (X) தளத்தில் பதிவிட்டுள்ளார். இதன் மூலம் திமுக கூட்டணியில் உள்ள மதிமுக போட்டியிடும் அனைத்துத் தொகுதிகளிலும் உதயசூரியன் சின்னமே ஆதிக்கம் செலுத்தவுள்ளது உறுதியாகியுள்ளது.