தமிழக சட்டமன்றத் தேர்தலில் தனிப்பெரும் கட்சியாக உருவெடுத்துள்ள தமிழக வெற்றிக் கழகம் (தவெக) ஆட்சியமைக்க, காங்கிரஸ் கட்சி தனது நிபந்தனையுடனான ஆதரவை அதிகாரப்பூர்வமாக அறிவித்துள்ளது. திராவிடக் கட்சிகளுக்கு மாற்றாகக் களம் கண்ட தவெக, தனது முதல் தேர்தலிலேயே 108 இடங்களைக் கைப்பற்றி சாதனை படைத்துள்ள நிலையில், தொங்கு சட்டமன்றச் சூழல் நிலவுகிறது. பெரும்பான்மைக்குத் தேவையான 118 இடங்களை அடைய இன்னும் 10 இடங்கள் தேவைப்படும் நிலையில், மற்ற கட்சிகளின் ஆதரவை அக்கட்சியின் தலைவர் விஜய் கோரினார்.
இதனை ஏற்றுக்கொண்ட அகில இந்திய காங்கிரஸ் கமிட்டியின் தமிழகப் பொறுப்பாளர் கிரிஷ் சோடங்கர், விஜய்யின் கோரிக்கைக்கு காங்கிரஸ் பச்சைக்கொடி காட்டியுள்ளதாகத் தெரிவித்துள்ளார். இளைஞர்கள் மற்றும் மக்களின் மாற்றத்திற்கான தீர்ப்பை மதிக்கும் வகையில் இந்த முடிவு எடுக்கப்பட்டுள்ளதாக அவர் குறிப்பிட்டுள்ளார். இருப்பினும், அரசியலமைப்பில் நம்பிக்கையற்ற வகுப்புவாத சக்திகளை எக்காரணம் கொண்டும் கூட்டணியில் சேர்க்கக்கூடாது என்ற முக்கிய நிபந்தனையை காங்கிரஸ் விதித்துள்ளது.
காமராஜரின் பொற்கால ஆட்சி, பெரியாரின் சமூக நீதி மற்றும் அம்பேத்கரின் அரசியலமைப்பு நெறிகளை நிலைநாட்டும் நோக்கில் இந்த ஆதரவு வழங்கப்படுவதாக காங்கிரஸ் தரப்பில் தெரிவிக்கப்பட்டுள்ளது. இக்கூட்டணி தற்போதைய ஆட்சியமைப்பதோடு நில்லாமல், வருங்கால உள்ளாட்சி மற்றும் நாடாளுமன்றத் தேர்தல்களிலும் தொடரும் என்று அறிவிக்கப்பட்டுள்ளது. விஜய் மற்றும் ராகுல் காந்தி ஆகிய இரு தலைவர்களும் இணைந்து தமிழக இளைஞர்களின் கனவுகளை நனவாக்கப் போவதாக அந்த அறிக்கையில் உறுதி அளிக்கப்பட்டுள்ளது.