2026 சட்டப்பேரவைத் தேர்தலில் விசிக எம்எல்ஏ ஆளூர் ஷாநவாஸிற்கு மீண்டும் வாய்ப்பு அளிக்கப்படாதது தொடர்பாக சமூக வலைதளங்களில் எழுந்த விமர்சனங்களுக்கு அக்கட்சியின் தலைவர் திருமாவளவன் விளக்கமளித்துள்ளார். ஆளூர் ஷாநவாஸைத் தவிர்க்க வேண்டும் என்பது தனது நோக்கமல்ல என்றும், நாகை தொகுதி மீண்டும் விசிகவுக்குக் கிடைத்திருந்தால் அவரே வேட்பாளராக நிறுத்தப்பட்டிருப்பார் என்றும் அவர் கூறியுள்ளார். நாகை தொகுதி ஜவாஹிருல்லா தலைமையிலான கட்சிக்குச் சென்றது மற்றும் ஆளூர் ஷாநவாஸ் கேட்ட பல்லாவரம் தொகுதி தேமுதிகவுக்கு ஒதுக்கப்பட்டது போன்ற சூழல்களே இதற்குக் காரணம் என அவர் சுட்டிக்காட்டியுள்ளார். முதல்வர் அறிவுறுத்தலின்படி அவசர கதியில் தொகுதிப் பங்கீடு முடிக்கப்பட்ட நிலையில், அப்துல் ரகுமானுக்கு வாய்ப்பு வழங்கப்பட்டதில் எந்த உள்நோக்கமும் இல்லை என்று திருமாவளவன் தெளிவுபடுத்தியுள்ளார்.
தலைமையின் முடிவுக்கு ஆளூர் ஷாநவாஸ் கட்டுப்பாடு
தமக்கு வாய்ப்பு மறுக்கப்பட்டது குறித்து சமூக வலைதளங்களில் விவாதிக்கப்பட்டு வரும் நிலையில், ஆளூர் ஷாநவாஸ் தனது நிலைப்பாட்டைத் தெரிவித்துள்ளார். ஒரு கட்சியில் யாருக்கு வாய்ப்பளிக்க வேண்டும் என்பதைத் தலைமைதான் முடிவு செய்யும் என்றும், அந்த முடிவை ஏற்பதே சிறந்த அறம் என்றும் அவர் குறிப்பிட்டுள்ளார். தனக்காகக் குரல் கொடுத்த தோழர்களுக்கு நன்றி தெரிவித்துள்ள அவர், தேர்தலில் விசிக தலைவர் திருமாவளவன் உள்ளிட்ட எட்டு வேட்பாளர்களின் வெற்றிக்காகவும், திமுக தலைமையிலான ஆட்சி மீண்டும் அமையவும் அனைவரும் ஒருங்கிணைந்து பாடுபட வேண்டும் என வேண்டுகோள் விடுத்துள்ளார். மேலும், எம்எல்ஏ-வாக இருந்ததை விட இன்னும் வீரியத்துடன் களத்தில் தொடர்ந்து பணியாற்றுவேன் என்றும் அவர் உறுதிப்படத் தெரிவித்துள்ளார்.