தமிழகத்தில் 2026 சட்டமன்றத் தேர்தலை முன்னிட்டு அதிமுக தலைமையிலான கூட்டணியில் தொகுதிப் பங்கீட்டுப் பணிகள் விறுவிறுப்பாக நடைபெற்று வருகின்றன. அதன் ஒரு பகுதியாக, இந்திய ஜனநாயக கட்சி (ஐஜேகே), தமிழக மக்கள் முன்னேற்றக் கழகம் (தமமுக) மற்றும் புரட்சி பாரதம் ஆகிய கட்சிகளுக்கான தொகுதிகள் தற்போது உறுதி செய்யப்பட்டுள்ளன. இதன்படி பாரிவேந்தர் தலைமையிலான ஐஜேகே-வுக்கு 2 தொகுதிகளும், ஜான் பாண்டியனின் தமமுக மற்றும் புரட்சி பாரதம் ஆகிய கட்சிகளுக்கு தலா ஒரு தொகுதியும் ஒதுக்கீடு செய்யப்பட்டுள்ளன.
ஏற்கனவே இந்தக் கூட்டணியில் பாரதிய ஜனதா கட்சிக்கு 27 இடங்களும், பாட்டாளி மக்கள் கட்சிக்கு 18 இடங்களும், அமமுக-வுக்கு 11 இடங்களும் வழங்கப்பட்டுள்ளன. ஜி.கே.வாசனின் தமிழ் மாநில காங்கிரஸ் கட்சிக்கு 5 தொகுதிகள் ஒதுக்கப்பட்டுள்ள நிலையில், அந்த இடங்கள் அனைத்திலும் தமாகா வேட்பாளர்கள் தாமரை சின்னத்திலேயே போட்டியிடுவார்கள் என அறிவிக்கப்பட்டுள்ளது. அதேநேரம், ஏ.சி.சண்முகத்தின் புதிய நீதிக் கட்சி மற்றும் திருமாறனின் தென்னிந்திய பார்வர்டு பிளாக் உள்ளிட்ட சில கட்சிகளுடன் இன்னும் பேச்சுவார்த்தை முழுமையடையவில்லை. இந்த உடன்பாடுகளைத் தொடர்ந்து, தோழமைக் கட்சிகள் போட்டியிடவுள்ள தொகுதிகளின் அதிகாரப்பூர்வப் பட்டியலை அதிமுக பொதுச்செயலாளர் எடப்பாடி பழனிசாமி வெளியிட்டுள்ளார்.