தமிழகத்தின் 234 தொகுதிகளிலும் பதிவான வாக்குகளை எண்ணும் பணி இன்று காலை முறைப்படி தொடங்கியது. முதற்கட்டமாக தபால் வாக்குகள் எண்ணப்பட்டு வரும் நிலையில், காலை 8:30 மணி முதல் மின்னணு வாக்குப்பதிவு இயந்திரங்களில் உள்ள வாக்குகள் எண்ணும் பணி தீவிரமடைந்துள்ளது. தேர்தலுக்குப் பிந்தைய நிலவரங்கள் மற்றும் முன்னிலைப் பட்டியல்கள் காலை 11 மணி அளவில் ஓரளவுக்குத் தெளிவாகத் தெரியவரும் என எதிர்பார்க்கப்படுகிறது. இந்தத் தேர்தலில் மொத்தம் உள்ள 234 தொகுதிகளில் 4,023 வேட்பாளர்கள் களத்தில் உள்ளனர். மொத்தமுள்ள 5.73 கோடி வாக்காளர்களில் 4.88 கோடி பேர் தங்களது ஜனநாயகக் கடமையை ஆற்றியுள்ளனர். இதற்காக மாநிலம் முழுவதும் 75,064 வாக்குச்சாவடிகள் அமைக்கப்பட்டு, 1,06,408 வாக்குப்பதிவு இயந்திரங்கள் பயன்படுத்தப்பட்டன.
தீர்மானிக்கப்படும் வெற்றி வாய்ப்புகள்
வாக்குப்பதிவு நிறைவடைந்ததைத் தொடர்ந்து, இயந்திரங்கள் அனைத்தும் பலத்த பாதுகாப்புடன் தமிழகம் முழுவதும் உள்ள 62 வாக்கு எண்ணும் மையங்களில் வைக்கப்பட்டிருந்தன. இந்த முறை தமிழக தேர்தல் களத்தில் திமுக, அதிமுக, நாம் தமிழர் மற்றும் முதல்முறை களம் கண்டுள்ள விஜய்யின் தமிழக வெற்றிக் கழகம் என நான்கு முனைப் போட்டி நிலவுகிறது. ஆரம்பத்தில் விஜய்யின் பொதுக்கூட்டங்களுக்குக் கூடிய கூட்டம் வாக்குகளாக மாறாது என்று விமர்சிக்கப்பட்ட நிலையில், தற்போது தவெக ஒரு மிகப்பெரிய அரசியல் மாற்றத்தை ஏற்படுத்தும் 'கேம் சேஞ்சராக' உருவெடுத்துள்ளதாக அரசியல் நோக்கர்கள் கருதுகின்றனர். திமுக மீண்டும் ஆட்சியைத் தக்கவைக்குமா அல்லது அதிமுக ஆட்சிக் கட்டிலில் அமருமா என்ற கேள்விக்கு மத்தியில், யாரும் எதிர்பாராத வகையில் தவெக திருப்பத்தை ஏற்படுத்துமா என்ற எதிர்பார்ப்பு மக்களிடையே அதிகரித்துள்ளது. இதற்கான அதிகாரப்பூர்வமான முதற்கட்ட முடிவுகள் இன்னும் சில மணி நேரங்களில் வெளியாகத் தொடங்கும்.