சென்னையில் மே தின விழாவையொட்டி செய்தியாளர்களைச் சந்தித்த தமிழ்நாடு காங்கிரஸ் கமிட்டி தலைவர் செல்வப்பெருந்தகை, தமிழகத்தில் திமுக தலைமையிலான கூட்டணி 200-க்கும் மேற்பட்ட தொகுதிகளைக் கைப்பற்றி அசுர வெற்றி பெறும் எனத் தெரிவித்தார். தற்போது வெளியாகி வரும் சில முடிவுகளை 'கருத்துக்கணிப்பு' என்று ஏற்க முடியாது என்றும், அவை திட்டமிட்டு செய்யப்படும் 'கருத்துத் திணிப்பு' என்றும் அவர் சாடினார்.
மக்கள் ஏற்கனவே தெளிவான தீர்ப்பை வழங்கிவிட்டார்கள் என்றும், மே 4-ம் தேதி மு.க. ஸ்டாலின் அவர்கள் மீண்டும் முதலமைச்சராகப் பொறுப்பேற்பது உறுதி என்றும் அவர் கூறினார். பிரதமர் மோடி மாநிலத்திற்கு மாநிலம் முரண்பாடாகப் பேசி வருவதாகவும், தமிழகத்தில் மதவாத அரசியலுக்கு ஒருபோதும் இடமில்லை என்பதால் பாஜக படுதோல்வியைச் சந்திக்கும் என்றும் அவர் சுட்டிக்காட்டினார்.
சட்டப் போராட்டமும் தொழிலாளர் உரிமையும்
பேரறிவாளன் வழக்கறிஞராகப் பதிவு செய்த விவகாரம் குறித்துப் பேசிய அவர், இது குறித்து காங்கிரஸ் நாடாளுமன்ற உறுப்பினர்கள் கவனித்து வருவதாகவும், கட்சியின் சட்டக்குழு எடுக்கும் முடிவே தனது நிலைப்பாடு என்றும் விளக்கமளித்தார். வருமான வரித்துறை சோதனைகள் உள்ளிட்ட மத்திய அரசின் எத்தகைய சவால்களையும் சட்டரீதியாக எதிர்கொள்ளத் தயாராக இருப்பதாகக் குறிப்பிட்ட அவர், தொழிலாளர் நல உரிமைகளுக்காக காங்கிரஸ் பேரியக்கம் எப்போதும் துணை நிற்கும் என்றும், இந்த நாளை ஒரு உரிமைப் போராட்டத் திருவிழாவாகக் கொண்டாடுவதாகவும் பெருமிதத்துடன் தெரிவித்தார்.