புதிய தமிழகம் கட்சியின் 43 பேர் கொண்ட முதற்கட்ட வேட்பாளர் பட்டியல் வெளியீடு!

அதிமுக கூட்டணியுடனான தொகுதிப் பங்கீட்டில் ஏற்பட்ட இழுபறி காரணமாக, வரும் சட்டமன்றத் தேர்தலில் தனித்துப் போட்டியிட முடிவு செய்துள்ள புதிய தமிழகம் கட்சி, தனது முதற்கட்ட வேட்பாளர் பட்டியலை வெளியிட்டுள்ளது. கட்சியின் தலைவர் டாக்டர் கிருஷ்ணசாமி இந்த 43 பேர் கொண்ட பட்டியலை நேற்று அறிவித்தார். இதன்படி, ஒட்டப்பிடாரம் தொகுதியில் கிருஷ்ணசாமி போட்டியிடும் நிலையில், அவரது மகன் ஷியாம் கிருஷ்ணசாமி ஸ்ரீவில்லிப்புத்தூர் மற்றும் நெல்லை என இரண்டு தொகுதிகளில் களம் காண்கிறார். மேலும், வாசுதேவநல்லூரில் பால்ராஜ், கடையநல்லூரில் கவி, நாங்குநேரியில் தமிழ்செல்வி, நிலக்கோட்டையில் பொ.சங்கர் மற்றும் பட்டுக்கோட்டையில் மா.குருமூர்த்தி ஆகியோர் வேட்பாளர்களாக அறிவிக்கப்பட்டுள்ளனர். அதேபோல், திருவெறும்பூரில் அ.பிச்சைமுத்து, ஆண்டிப்பட்டியில் மகா.இளையராஜா, முசிறியில் மு.சின்னையன், திருவாரூரில் மூ.தியாகராஜன், நன்னிலத்தில் மு.தமிழ்செல்வம், விராலிமலையில் அ.செல்வராஜ் மற்றும் சாத்தூரில் சு.வேல்முருகன் உள்ளிட்ட 43 முக்கிய வேட்பாளர்கள் இந்தப் பட்டியலில் இடம் பெற்றுள்ளனர். அதிமுக கூட்டணியில் இருந்து விலகி தனித்துக் களமிறங்கியுள்ள புதிய தமிழகம் கட்சியின் இந்த அதிரடி முடிவு அரசியல் வட்டாரத்தில் கவனத்தை ஈர்த்துள்ளது.