தமிழக சட்டப்பேரவைத் தேர்தலை முன்னிட்டு, பாட்டாளி மக்கள் கட்சியின் தேர்தல் அறிக்கையைப் அக்கட்சியின் தலைவர் அன்புமணி ராமதாஸ் இன்று வெளியிட்டார். அதிமுக தலைமையிலான தேசிய ஜனநாயகக் கூட்டணியில் 18 தொகுதிகளில் போட்டியிடும் பாமக, மக்கள் நலன் சார்ந்த பல்வேறு அதிரடி வாக்குறுதிகளை முன்வைத்துள்ளது.
முக்கிய வாக்குறுதிகள்
தமிழகம் முழுவதும் பூரண மதுவிலக்கு அமல்படுத்தப்படும் என்பது பாமகவின் முதன்மை வாக்குறுதியாக உள்ளது. பெண்களின் திருமண வயதை 21 ஆக உயர்த்துதல் மற்றும் சாதிவாரி கணக்கெடுப்பு நடத்துதல் போன்ற சமூக மாற்றத்திற்கான திட்டங்களும் இதில் இடம்பெற்றுள்ளன. கல்வித் துறையைப் பொறுத்தவரை, மாணவர்களின் கல்விக்கடன் ரத்து செய்யப்படும் என்றும், தனியார் பள்ளிகளில் பயிலும் மாணவர்களின் கல்வி கட்டணத்தை அரசே ஏற்கும் என்றும் தெரிவிக்கப்பட்டுள்ளது.
வேலைவாய்ப்பு மற்றும் நிதி உதவி
வேலைவாய்ப்பற்ற பட்டதாரிகளுக்கு மாதம் ரூ.5,000 உதவித்தொகை வழங்கப்படும் என அறிவிக்கப்பட்டுள்ளது. மேலும், 5 லட்சம் அரசுப் பணியிடங்கள் நிரப்பப்படும் என்றும், தனியார் மற்றும் பொதுத்துறை மூலமாக ஒரு கோடி வேலைவாய்ப்புகள் உருவாக்கப்படும் என்றும் பாமக வாக்குறுதி அளித்துள்ளது. குடும்பத் தலைவிகளுக்கு மாதம் ரூ.2,000 நிதியுதவி வழங்கப்படும் எனத் தெரிவிக்கப்பட்டுள்ளது.
உணவு மற்றும் விவசாயம்
மக்களின் உணவுத் தேவையைப் பூர்த்தி செய்ய ரூ.10-க்கு 'மக்கள் சாப்பாடு' திட்டம் அறிமுகப்படுத்தப்படும். குறிப்பாக, ஞாயிற்றுக்கிழமைகளில் ரூ.25-க்கு அசைவ உணவு வழங்கப்படும் எனப் புதிய அறிவிப்பு வெளியிடப்பட்டுள்ளது. ரேஷன் அட்டைகளுக்கு 2 கிலோ நாட்டுச் சர்க்கரை வழங்கப்படும். விவசாயிகளை ஊக்குவிக்கக் கரும்புக்கு டன்னுக்கு ரூ.5,000 கொள்முதல் விலை மற்றும் பயிர்க்கடன் தள்ளுபடி போன்ற அம்சங்கள் இடம்பெற்றுள்ளன.
நிர்வாக மாற்றங்கள்
நிர்வாக வசதிக்காகத் திருச்சியைத் தமிழகத்தின் இரண்டாவது தலைநகரமாக மாற்றுவோம் என்றும், நீட் தேர்வில் இருந்து தமிழகத்திற்கு விலக்கு பெற உரிய நடவடிக்கை எடுக்கப்படும் என்றும் பாமக தனது தேர்தல் அறிக்கையில் உறுதி அளித்துள்ளது.