தமிழக சட்டப்பேரவைத் தேர்தல் வரும் ஏப்ரல் 23-ஆம் தேதி நடைபெறுவதை முன்னிட்டு, மக்கள் தங்கள் சொந்த ஊர்களுக்குச் சென்று வாக்களிக்க வசதியாகத் தொடர் விடுமுறை நாட்களைப் பயன்படுத்திப் பயணம் மேற்கொண்டு வருகின்றனர். இந்தச் சூழலைப் பயன்படுத்தி தனியார் ஆம்னி பேருந்துகள் பயணிகளிடம் வழக்கத்தை விடக் கூடுதலான கட்டணம் வசூலிப்பதாகப் புகார்கள் எழுந்துள்ளன. இதனைத் தடுக்கும் வகையில், ஏப்ரல் 21 முதல் 26-ஆம் தேதி வரை தனியார் பேருந்துகளைக் கண்காணிக்கத் போக்குவரத்து மற்றும் சாலை பாதுகாப்பு ஆணையரகம் அதிரடி உத்தரவைப் பிறப்பித்துள்ளது.
விதிமீறல்களைத் தடுக்கச் சிறப்புப் படைகள் அமைப்பு
அதிகக் கட்டணம் வசூலிக்கும் ஆம்னி பேருந்துகளைக் கண்டறிந்து நடவடிக்கை எடுக்க, தமிழகம் முழுவதும் வட்டாரப் போக்குவரத்து அலுவலர்கள், மோட்டார் வாகன ஆய்வாளர்கள் மற்றும் சோதனைச்சாவடி அதிகாரிகள் உள்ளடங்கிய விசேஷக் கண்காணிப்புக் குழுக்கள் அமைக்கப்பட்டுள்ளன. இந்தச் சிறப்புக் குழுவினர் மாநிலம் முழுவதும் தீவிரச் சோதனையில் ஈடுபடுவார்கள் என்றும், விதிகளை மீறி அதிகக் கட்டணம் வசூலிக்கும் பேருந்துகளின் உரிமம் ரத்து செய்யப்படும் என்றும் ஆணையர் தனது அறிக்கையில் கடுமையாக எச்சரித்துள்ளார்.
புகார்களைத் தெரிவிக்க எளிய வழிமுறைகள்
பயணிகளிடம் நிர்ணயிக்கப்பட்ட கட்டணத்தை விடக் கூடுதலாகப் பணம் வசூலிக்கப்பட்டால், அது குறித்து உடனடியாகப் புகார் அளிக்கப் போக்குவரத்துத் துறை அறிவுறுத்தியுள்ளது. இதற்கென வழங்கப்பட்டுள்ள பிரத்யேக அலைப்பேசி எண்கள் மூலம் வாட்ஸ்அப், குறுஞ்செய்தி அல்லது குரல் பதிவு வாயிலாகப் பொதுமக்கள் தங்களது புகார்களைத் தெரிவிக்கலாம். பொதுமக்களின் பயணத்தைச் சாதகமாகப் பயன்படுத்திச் சுரண்டலில் ஈடுபடும் நிறுவனங்கள் மீது கடும் சட்ட நடவடிக்கை எடுக்கப்படும் எனப் போக்குவரத்து ஆணையரகம் உறுதிபடத் தெரிவித்துள்ளது.
- போக்குவரத்து மற்றும் சாலை பாதுகாப்பு ஆணையரகம், சென்னை 1800 425 6151
- இணைப்போக்குவரத்து ஆணையரகம், சென்னை (வடக்கு) 99442 53404
- இணைப்போக்குவரத்து ஆணையரகம், சென்னை (தெற்கு) 97905 50052
- இணைப்போக்குவரத்து ஆணையரகம், மதுரை 90953 66394
- இணைப்போக்குவரத்து ஆணையரகம், கோயம்புத்தூர் 91235 93971
- துணைப்போக்குவரத்து ஆணையரகம், விழுப்புரம் 96773 98825
- துணைப்போக்குவரத்து ஆணையரகம், வேலூர் 98400 23011
- துணைப்போக்குவரத்து ஆணையரகம், சேலம் 78456 36423
- துணைப்போக்குவரத்து ஆணையரகம், ஈரோடு 80569 40040
- துணைப்போக்குவரத்து ஆணையரகம், திருச்சிராப்பள்ளி 90660 32343
- துணைப்போக்குவரத்து ஆணையரகம், விருதுநகர் 90257 23800
- துணைப்போக்குவரத்து ஆணையரகம், திருநெல்வேலி 96981 18011
- துணைப்போக்குவரத்து ஆணையரகம், தஞ்சாவூர் 95850 20865