"மக்களின் ஆணையை மதிக்க வேண்டும்" - விஜய் ஆட்சி அமைக்க ஆதரவாக கமல்ஹாசன் குரல்

தமிழக சட்டப்பேரவைத் தேர்தலில் எந்தவொரு கட்சிக்கும் மக்கள் முழுமையான பெரும்பான்மையை வழங்காத சூழலில், அதிக இடங்களைக் கைப்பற்றியுள்ள தமிழக வெற்றிக் கழகத்தை ஆட்சி அமைக்க அழைக்காதது ஜனநாயகத்திற்கு எதிரானது என்று மக்கள் நீதி மய்யத்தின் தலைவர் கமல்ஹாசன் கண்டனம் தெரிவித்துள்ளார். இது தொடர்பாக அவர் வெளியிட்டுள்ள சமூக வலைதளப் பதிவில், தமிழக வரலாற்றில் முன்னெப்போதும் இல்லாத வகையில் இத்தகையதொரு தேர்தல் முடிவை மக்கள் வழங்கியுள்ளதாகக் குறிப்பிட்டுள்ளார். மேலும், திமுக தலைவர் மு.க. ஸ்டாலின் மக்கள் தீர்ப்பை ஏற்றுக்கொண்டு பொறுப்பான எதிர்க்கட்சியாகச் செயல்படுவோம் என அறிவித்திருப்பதை அவரது அரசியல் முதிர்ச்சியாகக் கருதி பாராட்டுவதாகவும் கமல் தெரிவித்துள்ளார்.

அரசியலமைப்புச் சட்ட கடமை

தற்போது நிலவும் அரசியல் இழுபறி குறித்துப் பேசியுள்ள கமல்ஹாசன், ஆளுநர் உள்ளிட்ட அரசியலமைப்புப் பதவிகளில் இருப்பவர்கள் தங்களின் கடமையைச் சரியாக நிறைவேற்ற வேண்டும் என வலியுறுத்தியுள்ளார். தேர்ந்தெடுக்கப்பட்ட 233 உறுப்பினர்கள் இன்னும் பதவியேற்க முடியாமல் இருப்பது மாநிலத்திற்கே நேர்ந்த அவமானம் என்று அவர் ஆதங்கம் தெரிவித்துள்ளார். 108 இடங்களில் வெற்றி பெற்றுள்ள விஜய்யின் கட்சிக்கு ஆட்சி அமைக்க வாய்ப்பு வழங்காமல் காலதாமதம் செய்வது, வாக்களித்த தமிழக மக்களின் ஆணையை அவமதிக்கும் செயலாக அமையும் என்றும் அவர் தனது பதிவில் சுட்டிக்காட்டியுள்ளார்.

உச்ச நீதிமன்றத் தீர்ப்பு சுட்டிக்காட்டு

ஆளுநர் மாளிகையில் பெரும்பான்மையை நிரூபிப்பதைக் காட்டிலும், சட்டமன்றத்தில் அதனை நிரூபிப்பதே முறையானது என எஸ்.ஆர். பொம்மை வழக்கில் உச்ச நீதிமன்றம் வழங்கிய தீர்ப்பை கமல்ஹாசன் நினைவு கூர்ந்துள்ளார். இது ஒரு கட்சி சார்ந்த நிலைப்பாடு அல்ல என்றும், ஓர் இந்தியக் குடிமகனாகத் தனது கொள்கைக் குரலை எழுப்புவதாகவும் அவர் கூறியுள்ளார். தமிழக மக்களின் தீர்ப்புக்கு உரிய மரியாதை கிடைக்க வேண்டும் என்பதே தனது பிரதான நோக்கம் என அவர் திட்டவட்டமாகத் தெரிவித்துள்ளார்.

தேர்தல் நிலவரம் மற்றும் பெரும்பான்மை

சமீபத்தில் நடந்து முடிந்த தேர்தலில் தமிழக வெற்றிக் கழகம் 108 தொகுதிகளைக் கைப்பற்றி தனிப்பெரும் கட்சியாக உருவெடுத்துள்ளது. இதற்கு அடுத்தபடியாக திமுக 59 இடங்களிலும், அதிமுக 47 இடங்களிலும் வெற்றி பெற்றுள்ளன. இதர கட்சிகளான காங்கிரஸ் 5, பாமக 4 இடங்களைப் பிடித்த நிலையில், ஐயுஎம்எல், கம்யூனிஸ்ட் கட்சிகள் மற்றும் விசிக தலா 2 இடங்களைப் பெற்றுள்ளன. பாஜக, தேமுதிக, அமமுக ஆகிய கட்சிகள் தலா ஒரு தொகுதியில் வென்றுள்ளன. தமிழக சட்டமன்றத்தில் ஆட்சியமைக்க 118 எம்எல்ஏக்களின் ஆதரவு தேவைப்படும் நிலையில், தவெக-வுக்கு இன்னும் சில இடங்களே குறைவாக உள்ளதால் அரசியல் களம் சூடுபிடித்துள்ளது.