2026 தமிழகச் சட்டமன்றத் தேர்தலில் மக்கள் நீதி மய்யம் நேரடியாகப் போட்டியிடப் போவதில்லை என்றும், திமுக தலைமையிலான கூட்டணி வேட்பாளர்களை நிபந்தனையின்றி ஆதரிக்கப் போவதாகவும் அக்கட்சியின் தலைவர் கமல்ஹாசன் எம்.பி. அதிரடியாக அறிவித்துள்ளார். சென்னை அண்ணா அறிவாலயத்தில் முதலமைச்சர் மு.க.ஸ்டாலினைச் சந்தித்த பிறகு செய்தியாளர்களிடம் பேசிய அவர், இந்த முடிவைத் தெளிவுபடுத்தினார். தமக்கு அரசியல் என்பது ஒரு தொழில் அல்ல என்றும், அது ஒரு கடமை என்றும் குறிப்பிட்ட அவர், தற்போதைய ஆட்சி தொடர வேண்டும் என்பதே தனது விருப்பம் என்று தெரிவித்தார். திமுக தரப்பில் தமக்கு மிகுந்த மரியாதையையும் அன்பையும் அளித்ததாகவும், தேர்தலுக்கு அப்பால் ஒரு பெரிய போராட்டத்திற்காகவே இந்த முடிவை எடுத்துள்ளதாகவும் அவர் விளக்கமளித்தார்.
இது தொடர்பாக அவர் வெளியிட்டுள்ள விரிவான அறிக்கையில், கடந்த நாடாளுமன்றத் தேர்தலில் தேச நலனுக்காக திமுகவுடன் கைகோர்த்ததை நினைவு கூர்ந்துள்ளார். நடப்பு சட்டமன்றத் தேர்தலுக்கான தொகுதிப் பங்கீடு பேச்சுவார்த்தையின் போது, திமுக தரப்பில் ஒதுக்கப்பட்ட தொகுதிகளின் எண்ணிக்கையும், உதயசூரியன் சின்னத்தில் போட்டியிட வேண்டும் என்ற கோரிக்கையும் தமது தொண்டர்களின் உணர்வுகளுக்கு ஏற்புடையதாக இல்லை என்று அவர் குறிப்பிட்டுள்ளார். குறிப்பாக, 'பேட்டரி டார்ச்' சின்னம் என்பது வெறும் அடையாளம் மட்டுமல்ல, அது தொண்டர்களின் உணர்வுப்பூர்வமான பிணைப்பு என்றும், அதைத் தம்மால் விட்டுக்கொடுக்க முடியாது என்றும் அவர் தெரிவித்துள்ளார். அதேசமயம், தமிழகத்தைக் கைப்பற்ற நினைக்கும் மதவாத சக்திகளின் சூழ்ச்சியை முறியடிக்கக் கூட்டணியின் வெற்றி முக்கியமானது என்பதை உணர்ந்து, தமக்கு ஒதுக்கப்பட்ட இடங்களை விட்டுக் கொடுப்பதாக அவர் கூறியுள்ளார்.
தமது இந்த முடிவு தியாகம் அல்ல, ஒரு கடமை என்று குறிப்பிட்ட கமல்ஹாசன், தமிழகத்தின் முன்னேற்றத்திற்காக 'திராவிட மாடல் 2.0' அரசு அமைவது அவசியம் என்று வலியுறுத்தியுள்ளார். காந்தி, பெரியார், அம்பேத்கர் ஆகியோரின் கொள்கைகளைப் பாதுகாக்கும் ஒரு நீதிபரிபாலனமாகவே இந்த ஆட்சியைத் தாம் பார்ப்பதாகவும், எனவே எந்தவித நிபந்தனையுமின்றி திமுக கூட்டணிக்கு ஆதரவு அளிப்பதாகவும் அவர் அறிவித்துள்ளார். தேர்தல் என்பது அரசியலின் ஒரு பகுதிதான் என்றும், மண்ணுக்காகவும் மொழிக்காகவும் மக்கள் நீதி மய்யத்தின் போராட்டம் என்றும் தொய்வின்றித் தொடரும் என்றும் அவர் உருக்கமுடன் தெரிவித்துள்ளார். வரும் தேர்தலில் திமுக கூட்டணி அமோக வெற்றி பெற்று, முதலமைச்சர் மு.க.ஸ்டாலின் மீண்டும் பதவியேற்கும் விழாவில் அவரைச் சந்திப்போம் என்ற நம்பிக்கையுடன் தனது அறிக்கையை அவர் நிறைவு செய்துள்ளார்.