திமுகவின் அசைக்க முடியாத கோட்டையாகக் கருதப்படும் சென்னை மாநகரின் மொத்தமுள்ள 16 சட்டமன்றத் தொகுதிகளிலும், இன்று காலை முதலே தமிழக வெற்றிக் கழகம் முன்னிலை பெற்று வருவது அரசியல் வட்டாரங்களில் பெரும் அதிர்வலைகளை ஏற்படுத்தியுள்ளது. தமிழகத்தில் 2026 சட்டமன்றத் தேர்தலுக்கான வாக்குப்பதிவு கடந்த ஏப்ரல் 23-ஆம் தேதி முடிவடைந்த நிலையில், இன்று பலத்த பாதுகாப்புடன் வாக்குகள் எண்ணப்பட்டு வருகின்றன. சரியாக காலை 8 மணிக்கு தபால் வாக்குகள் எண்ணும் பணி தொடங்கிய நிலையில், 8:30 மணி முதல் மின்னணு வாக்குப்பதிவு இயந்திரங்களில் பதிவான வாக்குகள் எண்ணப்பட்டு வருகின்றன. வாக்கு எண்ணிக்கையின் தொடக்கத்தில் தபால் வாக்குகளில் திமுக முன்னிலை வகித்தாலும், அடுத்தடுத்த சுற்றுகளில் நிலைமை தலைகீழாக மாறியுள்ளது.
குறிப்பாக, தமிழக முதல்வர் மு.க.ஸ்டாலின் போட்டியிடும் கொளத்தூர் தொகுதி மற்றும் துணை முதல்வர் உதயநிதி ஸ்டாலின் களம் காணும் திருவல்லிக்கேணி தொகுதி உள்ளிட்ட முக்கிய அமைச்சர்களின் தொகுதிகளில் திமுக கடும் பின்னடைவைச் சந்தித்து வருகிறது. சென்னை முழுவதும் தமிழக வெற்றிக் கழகம் வசமாகும் வகையில் தவெக வேட்பாளர்கள் முன்னிலையில் உள்ளனர்.
வாக்கு சதவீத உயர்வும் அரசியல் மாற்றமும்
சென்னை மற்றும் அதன் புறநகர் பகுதிகள் பாரம்பரியமாகவே திமுகவின் பலமான இடங்களாக இருந்து வந்துள்ளன. மறைந்த முன்னாள் முதல்வர் ஜெயலலிதா தலைமையில் அதிமுக 2016-ல் தேர்தலைச் சந்தித்தபோது கூட, சென்னையில் உள்ள 16 இடங்களில் 10 தொகுதிகளை திமுகவே கைப்பற்றியது. அதனைத் தொடர்ந்து 2021 தேர்தலில், சென்னையில் உள்ள அனைத்து 16 தொகுதிகளையும் திமுக கூட்டணி முழுமையாகக் கைப்பற்றி தனது பலத்தை நிரூபித்தது. கடந்த தேர்தலில் கொளத்தூரில் முதல்வர் ஸ்டாலின் 70,384 வாக்குகள் வித்தியாசத்திலும், சேப்பாக்கம்-திருவல்லிக்கேணியில் உதயநிதி 69,335 வாக்குகள் வித்தியாசத்திலும் அபார வெற்றி பெற்றிருந்தனர்.
இருப்பினும், இந்தத் தேர்தலில் இதுவரை இல்லாத சாதனையாக சென்னையில் வாக்குப்பதிவு சதவீதம் 83.68 ஆக உயர்ந்துள்ளது. வழக்கமாக 60 சதவீதம் மட்டுமே பதிவாகும் சென்னையில், இம்முறை 11.72 லட்சம் ஆண்கள் மற்றும் 12.48 லட்சம் பெண்கள் என வாக்காளர்களின் எண்ணிக்கை கணிசமாக அதிகரித்துள்ளது. குறிப்பாக 7 தொகுதிகளில் 85 சதவீதத்திற்கும் மேலாக வாக்குகள் பதிவாகி இருப்பது, தற்போது தவெக முன்னிலை பெற்று வரும் சூழலில் மிக முக்கியமான மாற்றமாகக் கருதப்படுகிறது.