வாக்களிக்க ஏதுவாக ஏப்ரல் 23 பொது விடுமுறை: தேர்தல் ஆணையம் அதிரடி உத்தரவு!

தமிழக சட்டப்பேரவைத் தேர்தல் வாக்குப்பதிவு வரும் ஏப்ரல் 23-ஆம் தேதி நடைபெற உள்ள நிலையில், அன்று அனைத்து அரசு மற்றும் தனியார் நிறுவனங்களுக்குச் சம்பளத்துடன் கூடிய பொது விடுமுறை அளிக்க வேண்டும் என்று இந்திய தேர்தல் ஆணையம் தமிழக அரசுக்கு அறிவுறுத்தியுள்ளது. இந்தத் தேர்தலில் சுமார் 5.69 கோடி வாக்காளர்கள் தங்கள் ஜனநாயகக் கடமையை ஆற்ற உள்ளதால், பொதுத்துறை நிறுவனங்கள், கல்வி நிலையங்கள் மற்றும் தொழிற்சாலைகள் என அனைத்தும் இந்த விடுமுறைப் பட்டியலில் சேர்க்கப்பட்டுள்ளன. குறிப்பாக ஒரு தொழிலாளி பணியாற்றும் இடத்தில் தேர்தல் இல்லாவிட்டாலும், அவர் வாக்காளராக உள்ள தொகுதியில் தேர்தல் நடைபெற்றால் அவருக்குக் கட்டாயம் விடுப்பு வழங்கப்பட வேண்டும். நிரந்தரப் பணியாளர்கள் மட்டுமின்றி தினக்கூலித் தொழிலாளர்களுக்கும் இந்தப் பொது விடுமுறை மற்றும் ஊதியம் பொருந்தும் எனத் தேர்தல் ஆணையம் தெளிவுபடுத்தியுள்ளது.