தேனி மாவட்டம் ஆண்டிபட்டி சட்டமன்றத் தொகுதிக்கு உட்பட்ட வெள்ளிமலை வனக்கிராமத்தில், வெறும் ஐந்து வாக்காளர்களுக்காகத் தேர்தல் ஆணையம் பிரத்யேகமாக வாக்குச்சாவடி மையத்தை அமைக்கவுள்ளது. க.மயிலை ஒன்றியத்தில் உள்ள தும்மக்குண்டு ஊராட்சிக்கு உட்பட்ட இந்தப் பகுதி, ஒரு காலத்தில் 1,200 வாக்காளர்களைக் கொண்டு ஊராட்சியின் வெற்றி தோல்வியைத் தீர்மானிக்கும் வலிமை மிக்க இடமாக இருந்தது. ஆனால், கடந்த 1990-களுக்குப் பிறகு இந்தப் பகுதி புலிகள் காப்பகமாக அறிவிக்கப்பட்டதால் ஏற்பட்ட வனத்துறைக் கட்டுப்பாடுகள் மற்றும் வடமாநிலத் தொழிலாளர்களின் வருகை காரணமாக, உள்ளூர் மக்கள் படிப்படியாக இடம்பெயரத் தொடங்கினர்.
கடந்த நாடாளுமன்றத் தேர்தலின் போது இங்கிருந்த வாக்காளர்களின் எண்ணிக்கை 6 ஆக இருந்த நிலையில், தற்போது ஒருவரது பெயர் நீக்கப்பட்டு ஐந்தாகக் குறைந்துள்ளது. இருப்பினும், அந்த ஐந்து பேரின் ஜனநாயகக் கடமையை உறுதி செய்யும் வகையில் அங்குள்ள அரசு உதவிபெறும் பள்ளியில் தேர்தல் ஆணையம் வாக்குச்சாவடியை அமைக்கிறது. வெளியாட்கள் வந்து செல்லக் கடுமையான நேரக் கட்டுப்பாடுகள் உள்ள இந்த அடர்ந்த வனப்பகுதியில், மிகக் குறைந்த வாக்காளர்களுக்காகத் தேர்தல் பணிகள் நடைபெறுவது அனைவரின் கவனத்தையும் ஈர்த்துள்ளது. எம்.ஜி.ஆர் மற்றும் ஜெயலலிதா போன்ற ஆளுமைகள் வெற்றி பெற்ற தொகுதி என்பதால், இந்தத் தொகுதியின் ஒவ்வொரு வாக்கும் முக்கியத்துவம் வாய்ந்ததாகக் கருதப்படுகிறது.