அதிமுக பொதுச்செயலாளர் எடப்பாடி பழனிசாமி, 'ஒவ்வொரு குடும்பத்திற்கும் விலையில்லா ஃப்ரிட்ஜ் வழங்கப்படும்' என்பது உள்ளிட்ட கவர்ச்சிகரமான பல்வேறு வாக்குறுதிகள் நிறைந்த அதிமுகவின் தேர்தல் அறிக்கையை இன்று வெளியிட்டார்.
சென்னை ராயப்பேட்டையில் உள்ள அதிமுக தலைமை அலுவலகத்தில் எடப்பாடி பழனிசாமி வெளியிட்ட "அதிமுக தேர்தல் அறிக்கை 2026"-ல் இடம்பெற்றுள்ள மிக முக்கியமான சிறப்பம்சங்கள் இதோ
- பெண்களுக்கு மாதந்தோறும் 2,000 ரூபாய் உதவித்தொகை வழங்கப்படும்.
- நகரப் பேருந்துகளில் பெண்களைப் போலவே ஆண்களும் இனி இலவசமாகப் பயணம் செய்யலாம்.
- குடும்ப அட்டைதாரர்களுக்கு ஆண்டுதோறும் 3 எரிவாயு சிலிண்டர்கள் விலையில்லாமல் வழங்கப்படும்.
- பெண்கள் இருசக்கர வாகனங்கள் வாங்குவதற்கு 25,000 ரூபாய் மானியம் அளிக்கப்படும்.
- ரேஷன் கார்டுதாரர்களுக்கு மாதம் ஒரு கிலோ பருப்பு மற்றும் ஒரு லிட்டர் சமையல் எண்ணெய் வழங்கப்படும்.
- தமிழகத்தின் ஒவ்வொரு குடும்பத்திற்கும் விலையில்லா ஃப்ரிட்ஜ் (குளிர்சாதனப் பெட்டி) வழங்கப்படும்.
- முதியோர்களுக்கான மாதாந்திர உதவித்தொகை 2,000 ரூபாயாக உயர்த்தி வழங்கப்படும்.
- தமிழகத்தில் உள்ள அனைத்துக் குடும்பங்களுக்கும் தலா 10,000 ரூபாய் நிதியுதவி அளிக்கப்படும்.
- மாணவர்களின் கல்விக்கடனை முழுமையாக ரத்து செய்யத் தேவையான உரிய நடவடிக்கைகள் எடுக்கப்படும்.
அதிமுகவின் இந்தத் தேர்தல் அறிக்கையில் மொத்தம் 297 முக்கிய அறிவிப்புகள் இடம்பெற்றுள்ளதாக எடப்பாடி பழனிசாமி செய்தியாளர்களிடம் தெரிவித்தார்.