தமிழக அரசியலில் அடுத்த அதிரடி: புதுச்சேரி ரிசார்ட்டில் அதிமுக எம்எல்ஏக்கள் முகாம் - எடப்பாடி பழனிசாமி ஆலோசனை

தமிழக அரசியல் களம் தற்போது புதுச்சேரியை நோக்கித் திரும்பியுள்ளது. அதிமுக சட்டமன்ற உறுப்பினர்கள் அனைவரும் புதுச்சேரி பூர்ணாங்குப்பத்தில் உள்ள ஒரு தனியார் ரிசார்ட்டில் தங்குமாறு கட்சித் தலைமை உத்தரவிட்டதைத் தொடர்ந்து, அவர்கள் அங்கு வந்த வண்ணம் உள்ளனர். முன்னாள் அமைச்சர் சி.வி. சண்முகம் இதற்கான ஏற்பாடுகளை முன்னின்று கவனித்து வரும் நிலையில், பாதுகாப்பு கருதி புதுச்சேரி காவல்துறையினர் அங்கு குவிக்கப்பட்டுள்ளனர். இதுவரை ஓ.எஸ். மணியன், தளவாய் சுந்தரம் உள்ளிட்ட சுமார் 25 எம்எல்ஏக்கள் அங்கு வந்து சேர்ந்துள்ள நிலையில், எஞ்சியவர்களும் விரைவில் இணைவார்கள் என எதிர்பார்க்கப்படுகிறது.

தவெக-வின் ஆட்சி அமைக்கும் முயற்சி

சமீபத்திய சட்டப்பேரவைத் தேர்தலில் திமுக, அதிமுக ஆகிய இரு முக்கிய கட்சிகளையும் முந்தி, 108 தொகுதிகளில் வெற்றி பெற்று தமிழக வெற்றிக் கழகம் சாதனை படைத்தது. எனினும், தனிப்பெரும்பான்மைக்குத் தேவையான 118 இடங்கள் கிடைக்காததால், விஜய் இதர கட்சிகளின் ஆதரவை நாடினார். திமுக கூட்டணியில் இருந்து விலகிய காங்கிரஸ் கட்சி தனது 5 உறுப்பினர்களுடன் தவெக-வுக்கு ஆதரவு வழங்கியது. இதன் மூலம் அக்கட்சியின் பலம் 113-ஆக உயர்ந்த போதிலும், ஆளுநர் மாளிகை தரப்பில் 118 உறுப்பினர்களின் பட்டியலை சமர்ப்பித்தால் மட்டுமே ஆட்சி அமைக்க அழைப்பு விடுக்கப்படும் எனத் திட்டவட்டமாகத் தெரிவிக்கப்பட்டுள்ளது.

அதிமுகவுக்குள் வெடித்த ஆதரவு சர்ச்சை

இந்த இக்கட்டான நிலையில், அதிமுக சட்டமன்ற உறுப்பினர்களின் ஆலோசனைக் கூட்டம் சென்னையில் உள்ள எடப்பாடி பழனிசாமியின் இல்லத்தில் நேற்று நடைபெற்றது. அப்போது, முன்னாள் அமைச்சர் சி.வி. சண்முகம் தலைமையிலான ஒரு தரப்பினர் தமிழக வெற்றிக் கழகத்திற்கு ஆதரவளித்து ஆட்சி அமைக்க உதவலாம் என்று கருத்து தெரிவித்ததாகக் கூறப்படுகிறது. ஆனால், இந்தக் கோரிக்கையை எடப்பாடி பழனிசாமி மற்றும் கட்சியின் மூத்த நிர்வாகிகள் நிராகரித்துள்ளனர். இதன் பின்னரே, அதிமுகவின் நிலைப்பாட்டைத் தெளிவுபடுத்திய அக்கட்சியின் துணைப் பொதுச்செயலாளர் முனுசாமி, தவெக-வுக்கு அதிமுக எந்தக் காலத்திலும் ஆதரவு அளிக்காது என்று எடப்பாடி பழனிசாமியின் ஒப்புதலுடன் அதிகாரப்பூர்வமாக அறிவித்தார்.

எடப்பாடி பழனிசாமியின் புதுச்சேரி பயணம்

தங்கள் கட்சி எம்எல்ஏக்கள் யாரும் மாற்று முகாமுக்குச் சென்றுவிடக் கூடாது என்பதற்காக அவர்களைப் பாதுகாப்பாகப் புதுச்சேரி ரிசார்ட்டில் தங்க வைக்க அதிமுக தலைமை முடிவு செய்துள்ளது. இன்று அல்லது நாளை எடப்பாடி பழனிசாமி நேரில் புதுச்சேரி சென்று, அங்கு தங்கியுள்ள சட்டமன்ற உறுப்பினர்களுடன் முக்கிய ஆலோசனைகளை நடத்தவுள்ளார். இந்தச் சந்திப்பின் போது கட்சியின் அடுத்தகட்ட அரசியல் நகர்வுகள் மற்றும் வியூகங்கள் குறித்து இறுதி முடிவு எடுக்கப்படும் என்று தெரிகிறது. இதனால் தமிழக அரசியலில் நிலவும் பரபரப்பு இன்னும் சில நாட்களுக்கு நீடிக்கும் எனத் தெரிகிறது.