தமிழக சட்டப்பேரவைத் தேர்தலுக்கான வேட்புமனுத் தாக்கல் நிறைவடைந்த நிலையில், வேட்பாளர்கள் சமர்ப்பித்துள்ள சொத்து விவரங்கள் பொதுமக்களிடையே பெரும் விவாதத்தை ஏற்படுத்தியுள்ளன. இதில், திருச்சி லால்குடி தொகுதியில் அதிமுக சார்பில் போட்டியிடும் லீமா ரோஸ், தமிழகத்திலேயே அதிக சொத்து மதிப்பு கொண்ட வேட்பாளராக உருவெடுத்துள்ளார். இவரது குடும்பத்தின் ஒட்டுமொத்த சொத்து மதிப்பு சுமார் 6,000 கோடி ரூபாய் எனத் தெரியவந்துள்ளது.
தனிநபர் மற்றும் கணவர் பெயரிலுள்ள சொத்துக்கள்
லீமா ரோஸ் தனது பெயரில் மட்டும் சுமார் ரூ. 1,060 கோடி மதிப்பிலான சொத்துகளைப் பட்டியலிட்டுள்ளார். இதில் அசையும் சொத்துக்கள் ரூ. 139 கோடி மற்றும் அசையா சொத்துக்கள் ரூ. 921 கோடி ஆகும். இவரது கணவரான 'லாட்டரி அதிபர்' மார்ட்டின் பெயரில் உள்ள சொத்துக்கள் இவரை விடப் பல மடங்கு அதிகமாகும். மார்ட்டினின் அசையும் சொத்துக்கள் சுமார் ரூ. 3,262 கோடி மற்றும் அசையா சொத்துக்கள் சுமார் ரூ. 877 கோடி என மொத்தம் ரூ. 4,139 கோடி மதிப்பிலான சொத்துக்கள் கணக்கு காட்டப்பட்டுள்ளன. இவர்களது மகன் டைசினா மார்ட்டின் பெயரில் சுமார் ரூ. 700 கோடி மதிப்பிலான சொத்துக்கள் உள்ளன.
நகை மற்றும் ரொக்க விவரங்கள்
தனது உறுதிமொழிப் பத்திரத்தில், லீமா ரோஸ் தன்னிடம் 5 லட்சம் ரூபாய் ரொக்கமும், கணவரிடம் 56 லட்சம் ரூபாய் ரொக்கமும் இருப்பதாகக் குறிப்பிட்டுள்ளார். நகை விவரங்களைப் பொறுத்தவரை, லீமா ரோஸ் வசம் 19,233 கிராம் தங்கம், 1,31,813 கிராம் வெள்ளி, 1,217 கேரட் வைரம் மற்றும் 32 கிராம் பிளாட்டினம் உள்ளன. அவரது கணவர் மற்றும் மகன் பெயரிலும் கணிசமான அளவில் தங்கம் மற்றும் வெள்ளி நகைகள் இருப்பதாகக் குறிப்பிடப்பட்டுள்ளது.
விஜய்யை முந்திய சொத்து மதிப்பு
இந்தத் தேர்தலில் போட்டியிடும் அனைத்து வேட்பாளர்களையும் விட லீமா ரோஸ் முதலிடத்தில் உள்ளார். இந்தப் பட்டியலில் இரண்டாவது இடத்தில் உள்ள தமிழக வெற்றிக் கழகத் தலைவர் விஜய், சுமார் ரூ. 660 கோடி மதிப்பிலான சொத்துகளைக் கணக்கு காட்டியுள்ளார். விஜய்யின் சொத்து மதிப்பை விட லீமா ரோஸின் சொத்து மதிப்பு சுமார் 9 மடங்கு அதிகம் என்பது குறிப்பிடத்தக்கது. தமிழக அரசியல் வரலாற்றிலேயே ஒரு வேட்பாளர் ஆயிரக்கணக்கான கோடி ரூபாய் சொத்துகளை அதிகாரப்பூர்வமாகக் கணக்கு காட்டியிருப்பது இதுவே முதல்முறை எனக் கருதப்படுகிறது. லால்குடி தொகுதியில் அதிமுகவின் பலமான வேட்பாளராகக் களமிறங்கியுள்ள லீமா ரோஸ், மற்ற கட்சிகளுக்குப் பெரும் சவாலாகப் பார்க்கப்படுகிறார்.