சிவகங்கை தொகுதியில் போட்டியிடும் அனைத்திந்திய புரட்சித் தலைவர் மக்கள் முன்னேற்றக் கழக வேட்பாளர் குரு.முருகானந்தத்திற்கு ஆதரவு திரட்டும் வகையில், மனித உரிமை காக்கும் கட்சித் தலைவரான நடிகர் கார்த்திக் நேற்று முன்தினம் இரவு சிவகங்கை மற்றும் இடையமேலூர் பகுதிகளில் தீவிரப் பிரச்சாரம் மேற்கொண்டார். அப்போது பேசிய அவர், தான் யாரையும் தனிப்பட்ட முறையில் விமர்சிக்க வரவில்லை என்றும், அதர்மமும் துரோகமும் அதிகரிக்கும் போது நியாயம் கேட்கவே சசிகலா அரசியல் களத்திற்கு வந்துள்ளதாகக் குறிப்பிட்டார். சசிகலாவின் வருகை தமிழக அரசியலில் ஒரு பெரிய திருப்புமுனையை ஏற்படுத்தியுள்ளதாகக் கூறிய அவர், தானும் அவருக்குத் துணையாக இருப்பேன் என்று உறுதியளித்தார்.
நியாயத்துக்காகப் போராடும் சசிகலா
தமிழக மக்களை வளர்ச்சிப் பாதையில் கொண்டு செல்ல வேண்டும் என்ற நோக்கிலேயே சசிகலா களமிறங்கியுள்ளதாகக் குறிப்பிட்ட கார்த்திக், அவருக்கு யாரிடமும் பழிவாங்கும் எண்ணம் கிடையாது என்று தெரிவித்தார். சசிகலாவால் பதவி பெற்றவர்களே அவருக்குத் துரோகம் இழைத்துள்ளதாகக் குறிப்பிட்ட அவர், சசிகலா சந்தித்த துயரங்களை அவரை நேரில் சந்தித்த பின்னரே தான் உணர்ந்ததாக உருக்கமாகப் பேசினார். சசிகலாவை ஆதரிப்பதன் மூலமே மக்களுக்கு நல்ல மாற்றங்கள் நிகழும் என்றும் அவர் வலியுறுத்தினார்.
தமிழர் உரிமைகள் குறித்து விமர்சனம்
தொடர்ந்து பேசிய நடிகர் கார்த்திக், அரசியல் களத்தில் சிலர் தமிழ் மற்றும் தமிழர் உரிமைகள் குறித்துப் பேசினாலும், உண்மையில் அவர்கள் தமிழை அழிக்கும் செயல்களிலேயே ஈடுபடுவதாகச் சாடினார். அத்தகையவர்களிடமிருந்து தமிழைப் பாதுகாக்க வேண்டியது அவசியம் என்று குறிப்பிட்ட அவர், மொழி மற்றும் மக்களின் நலனுக்காகச் சசிகலாவின் கரத்தை வலுப்படுத்துமாறு பொதுமக்களிடம் கேட்டுக் கொண்டார்.