ஆன்லைன் பண மோசடிகளை கட்டுப்படுத்தும் நோக்கில் ரிசர்வ் வங்கி(ஆர்பிஐ) புதிய பாதுகாப்பு விதிகளை அறிமுகப்படுத்தியுள்ளது. அதன்படி, ₹10,000க்கு மேல் புதிய அல்லது தெரியாத பயனாளர்களுக்கு அனுப்பப்படும் யுபிஐ பணப் பரிவர்த்தனைகளுக்கு ஒரு மணி நேர தாமதம் அமல்படுத்தப்படுகிறது.
இந்த புதிய விதியின் மூலம், பயனாளர்கள் சந்தேகத்திற்கிடமான பரிவர்த்தனைகளை உடனடியாக ரத்து செய்யும் வாய்ப்பு பெறுவார்கள். பணம் உடனடியாகப் பரிமாறப்படாமல், ஒரு மணி நேரத்திற்கு பிறகே இலக்கு கணக்கில் சேரும்.
மேலும், புதிய சாதனம் அல்லது புதிய மொபைலில் முதன்முறையாக யுபிஐ கணக்கை பயன்படுத்தும் போது, 24 மணி நேரத்திற்கு அதிக தொகைகளை பரிமாற முடியாத பாதுகாப்பு நடைமுறையும் கொண்டு வரப்பட்டுள்ளது. இது கணக்கு பாதுகாப்பை அதிகரிக்கும் முக்கிய அம்சமாக கருதப்படுகிறது.
ஒவ்வொரு பரிவர்த்தனைக்கும் பின்னர் கூடுதல் சரிபார்ப்பு முறைகள்—ஓடிபி (OTP) அல்லது கைரேகை அடையாளம் போன்ற இரட்டை அடுக்கு பாதுகாப்பு—கட்டாயப்படுத்தப்படுவதையும் ஆர்பிஐ பரிசீலித்து வருகிறது.
மோசடி சம்பவங்கள் ஏற்பட்டால், வாடிக்கையாளர்கள் உடனடியாக புகார் அளித்தால் 100% பொறுப்பையும் வங்கிகள் ஏற்கும் என்று தெரிவிக்கப்பட்டுள்ளது. இதனால், முன்புபோல் வாடிக்கையாளர்கள் இழப்பை ஏற்க வேண்டிய நிலை குறையும்.
க்யூஆர் கோடு (QR Code) மூலம் வியாபாரிகளுக்கு பணம் செலுத்தும் முறைகளிலும் கூடுதல் பாதுகாப்பு விதிகள் அறிமுகப்படுத்தப்பட்டுள்ளன. அதேசமயம், கடைகள் அல்லது ஆன்லைன் ஷாப்பிங் போன்ற தினசரி பரிவர்த்தனைகளுக்கு இந்த 1 மணி நேர தாமத விதி பொருந்தாது என்று ஆர்பிஐ விளக்கம் அளித்துள்ளது.
பயனாளர்கள் அடிக்கடி பணம் அனுப்பும் நம்பகமான கணக்குகளை “வைட் லிஸ்ட்” (Whitelist) பட்டியலில் சேர்த்துக் கொள்ளும் வசதியும் வழங்கப்படுகிறது. இதன் மூலம், நம்பகமானவர்களுக்கு உடனடி பண பரிமாற்றம் செய்ய முடியும்.
டிஜிட்டல் பரிவர்த்தனைகள் அதிகரித்து வரும் நிலையில், இந்த புதிய நடவடிக்கைகள் மோசடிகளை கட்டுப்படுத்த முக்கிய பங்காற்றும் என எதிர்பார்க்கப்படுகிறது. இருப்பினும், பயனாளர்களின் விழிப்புணர்வே மிக முக்கியம் என ஆர்பிஐ வலியுறுத்தியுள்ளது.
பொதுமக்கள், ஓடிபி போன்ற நுணுக்கமான தகவல்களை யாரிடமும் பகிராமல் இருக்கவும், அறிமுகமற்ற நபர்களுக்கு பணம் அனுப்பும்போது கூடுதல் கவனம் செலுத்தவும் வலியுறுத்தப்பட்டுள்ளது.