இந்தியாவில் காகித ரூபாய் நோட்டுகளுக்குப் பதிலாகப் பிளாஸ்டிக் ரூபாய் நோட்டுகளைப் புழக்கத்திற்குக் கொண்டு வருவதற்கான சாத்தியக்கூறுகள் குறித்துப் பொதுவெளியில் பரவலான தகவல்கள் கசிந்துள்ளன. கிட்டத்தட்ட பத்து ஆண்டுகளுக்கு முன்பே இதற்கான ஆரம்பக்கட்ட ஆலோசனைகள் மற்றும் விவாதங்கள் நடத்தப்பட்ட போதிலும், தற்போது இந்திய ரிசர்வ் வங்கி (RBI) இந்தத் திட்டத்தை மீண்டும் கையில் எடுத்து மிகத் தீவிரமாகப் பரிசீலித்து வருவதாகத் தெரிகிறது.
அதிர்ச்சியை ஏற்படுத்திய அச்சிடும் செலவு
தற்போது புழக்கத்தில் உள்ள காகித ரூபாய் நோட்டுகளை அச்சிடுவதற்கான செலவு ஆண்டுக்கு ஆண்டு அசுர வேகத்தில் உயர்ந்து கொண்டே செல்வதுதான் ரிசர்வ் வங்கியின் இந்த அதிரடி முடிவுக்கு முக்கியக் காரணமாகும். கடந்த 2024ஆம் நிதியாண்டில் புதிய காகித நோட்டுகளை அச்சிடுவதற்கு 5,101.4 கோடி ரூபாய் செலவிடப்பட்ட நிலையில், கடந்த 2025ஆம் நிதியாண்டில் இந்தச் செலவினம் 6,372.8 கோடி ரூபாயாக எகிறியுள்ளது. ஒரே வருடத்தில் மட்டும் ரூபாய் நோட்டு அச்சிடும் செலவு சுமார் 1,000 கோடி ரூபாய்க்கும் மேல் அதிகரித்துள்ளது நிதியியல் துறையில் பெரும் அதிர்ச்சியை ஏற்படுத்தியுள்ளது.
பில்லியன் கணக்கில் சேதமடையும் காகித நோட்டுகள்
ரூபாய் நோட்டுகள் அச்சிடும் செலவு இவ்வளவு அதிகமாக உயர்வதற்குக் காகித நோட்டுகள் மிக எளிதாகச் சேதமடைந்து போவதுதான் முதன்மைக் காரணமாகக் கூறப்படுகிறது. கடந்த 2025ஆம் ஆண்டில் மட்டும் இந்திய மக்களிடமிருந்து சுமார் 23.8 பில்லியன் அளவிலான கிழிந்த மற்றும் மோசமடைந்த காகித ரூபாய் நோட்டுகள் ரிசர்வ் வங்கியால் திரும்பப் பெறப்பட்டுள்ளன. இது அதற்கு முந்தைய ஆண்டைக் காட்டிலும் 12.3 சதவீதம் அதிகமாகும். இதில் குறிப்பாக, புழக்கத்தில் அதிகமாகப் பயன்படுத்தப்படும் 500 ரூபாய் மற்றும் 100 ரூபாய் நோட்டுகள்தான் மிக அதிக அளவில் கிழிந்து கசங்கிப் பாழாகியுள்ளன என்பது குறிப்பிடத்தக்கது.
பாலிமர் நோட்டுகளின் அசாத்திய நன்மைகள்
தற்போது அறிமுகமாகப் போகும் பிளாஸ்டிக் ரூபாய் நோட்டுகள் என்பவை நாம் அன்றாடம் பயன்படுத்தும் கடினமான ஏடிஎம் கார்டுகளைப் போல இருக்காது. இவை 'பாலிமர்' எனப்படும் ஒரு தனித்துவமான, மிக மெல்லிய பிளாஸ்டிக் கலவையால் தயாரிக்கப்படுபவை ஆகும். இதனால் வழக்கமான காகித நோட்டுகளைப் போலவே இவற்றை மிக எளிதாக மடித்து நமது பர்ஸ்களில் வைத்துக் கொள்ள முடியும். மேலும், இந்த நோட்டுகள் தண்ணீரில் நனைந்தாலும் எவ்வித பாதிப்பும் ஏற்படாது, கைகளால் இழுத்தாலும் எளிதில் கிழியாது மற்றும் அழுக்குகள் படியாமல் நீண்ட காலத்திற்குப் புதியது போலவே நீடித்து உழைக்கும். எல்லாவற்றிற்கும் மேலாக, மைக்ரோ ஹோலோகிராம் மற்றும் சிறப்பு பாதுகாப்பு மை போன்ற அதீத தொழில்நுட்பங்கள் இதில் இடம்பெற உள்ளதால், கள்ள நோட்டுகளைத் தயாரிப்பது இனி முற்றிலும் சாத்தியமில்லாத ஒன்றாக மாறிவிடும்.
2012 தோல்வியும் தற்போதைய தீர்வும
காகித நோட்டுகளின் சேதங்களைத் தவிர்க்கும் நோக்கில், கடந்த 2012ஆம் ஆண்டிலேயே 10 ரூபாய் பாலிமர் நோட்டுகளைச் சோதனை அடிப்படையில் வெளியிட அப்போதைய மத்திய அரசு திட்டமிட்டிருந்தது. அதற்கேற்ப கொச்சி, மைசூர், ஜெய்பூர், புவனேஸ்வர் மற்றும் ஷிம்லா ஆகிய ஐந்து முக்கிய நகரங்களைத் தேர்ந்தெடுத்து, அங்கு ஒரு பில்லியன் பாலிமர் நோட்டுகளைப் புழக்கத்தில் விட முடிவெடுக்கப்பட்டது. ஆனால், அப்போது ஏடிஎம் (ATM) இயந்திரங்களில் ஏற்பட்ட சில தொழில்நுட்பக் கோளாறுகள் மற்றும் பொதுமக்கள் மத்தியில் எழுந்த பல்வேறு சந்தேகங்கள் காரணமாக அந்தத் திட்டம் பாதியிலேயே கைவிடப்பட்டது. ஆனால், தற்போதைய நவீனச் சூழலில் அந்தப் பழைய தொழில்நுட்பச் சிக்கல்கள் அனைத்தும் முற்றிலும் சரிசெய்யப்பட்டு விட்டதாக வங்கி வட்டாரங்கள் உறுதிப்படுத்தியுள்ளன.
60 நாடுகள் வரிசையில் இணையும் இந்தியா
உலக அளவில் ஏற்கனவே ஆஸ்திரேலியா, கனடா, இங்கிலாந்து, சிங்கப்பூர், மலேசியா, தாய்லாந்து, இந்தோனேஷியா, நியூசிலாந்து, வியட்நாம், ருமேனியா உள்ளிட்ட 60-க்கும் மேற்பட்ட நாடுகள் இந்த அதிநவீனப் பாலிமர் பிளாஸ்டிக் ரூபாய் நோட்டுகளை வெற்றிகரமாகப் பயன்படுத்தி வருகின்றன. அந்தப் பட்டியலில் இந்தியாவும் தற்போது இணையவுள்ளது. முதற்கட்டமாக 10 ரூபாய் மற்றும் 20 ரூபாய் நோட்டுகளை மட்டும் சோதனை முறையில் பிளாஸ்டிக் நோட்டுகளாக வெளியிட ரிசர்வ் வங்கி திட்டமிட்டுள்ளது. இந்தச் சோதனை முயற்சி பொதுமக்களிடையே நல்ல வரவேற்பைப் பெற்றுப் பெரிய அளவில் வெற்றியடையும் பட்சத்தில், மற்ற அனைத்து முக மதிப்பு கொண்ட ரூபாய் நோட்டுகளும் படிப்படியாகப் பிளாஸ்டிக் நோட்டுகளாக மாற்றப்படும் என்று எதிர்பார்க்கப்படுகிறது.