உலகின் மூன்றாவது பெரிய கச்சா எண்ணெய் நுகர்வு நாடான இந்தியா, சுமார் ஏழு ஆண்டுகளுக்குப் பிறகு மீண்டும் ஈரானிடமிருந்து கச்சா எண்ணெயைப் பெறத் தொடங்கியுள்ளது. கடந்த 2019-ஆம் ஆண்டு ஈரான் மீது அமெரிக்கா விதித்த பொருளாதாரத் தடைகள் காரணமாக நிறுத்தி வைக்கப்பட்டிருந்த இந்த வர்த்தகம், தற்போது மேற்கு ஆசியாவில் நிலவும் போர்ச் சூழல் மற்றும் ஹார்முஸ் ஜலசந்தி விநியோகத் தடைகள் காரணமாக மீண்டும் உயிர் பெற்றுள்ளது. சர்வதேசச் சந்தையில் நிலவும் எரிபொருள் தட்டுப்பாட்டைக் கருத்தில் கொண்டு, ஈரானிய எண்ணெய் மீதான தடைகளை அமெரிக்கா தற்காலிகமாகத் தளர்த்தியதைத் தொடர்ந்து இந்திய நிறுவனங்கள் இந்த இறக்குமதியை மேற்கொண்டுள்ளன.
பணம் செலுத்தல் மற்றும் கப்பல் திசைதிருப்பல் சர்ச்சை
ஈரானிலிருந்து குஜராத் நோக்கி வந்த கச்சா எண்ணெய் கப்பல், பணம் செலுத்துவதில் ஏற்பட்ட சிக்கலால் சீனாவுக்குத் திருப்பி விடப்பட்டதாகச் சமூக வலைதளங்களில் பரவிய செய்திகளை மத்திய பெட்ரோலியம் மற்றும் இயற்கை எரிவாயு அமைச்சகம் திட்டவட்டமாக மறுத்துள்ளது. இது குறித்து விளக்கம் அளித்துள்ள அமைச்சகம், ஈரானிய கச்சா எண்ணெய் இறக்குமதிக்கான நிதியைப் பரிமாற்றம் செய்வதில் எவ்விதத் தடையும் இல்லை என்றும், வதந்திகள் உண்மைக்குப் புறம்பானவை என்றும் தெரிவித்துள்ளது. 40-க்கும் மேற்பட்ட நாடுகளிலிருந்து எண்ணெய் இறக்குமதி செய்யும் இந்தியா, வணிக ரீதியான லாபத்தின் அடிப்படையில் எந்த நாட்டிலிருந்தும் எண்ணெய் பெறத் தனது நிறுவனங்களுக்கு முழு சுதந்திரம் அளித்துள்ளதைச் சுட்டிக்காட்டியுள்ளது.
சரக்கு ஆவணங்கள் மற்றும் தற்போதைய நிலை
கப்பல்கள் திசைதிருப்பப்பட்டதாகக் கூறப்படும் புகார்கள், சர்வதேச எண்ணெய் வர்த்தக நடைமுறைகளைப் புரியாமல் சொல்லப்படுபவை என அரசு சாடியுள்ளது. 'பில்ஸ் ஆஃப் லேடிங்' எனப்படும் சரக்கு ஆவணங்களில் குறிப்பிடப்படும் இலக்குகள், பயணத்தின்போது வணிகத் தேவைகளுக்காக மாற்றப்படுவது இயல்பான ஒன்று எனத் தெரிவிக்கப்பட்டுள்ளது. மேலும், சமையல் எரிவாயு தட்டுப்பாடு குறித்த அச்சத்தையும் அரசு போக்கியுள்ளது. சுமார் 44 ஆயிரம் மெட்ரிக் டன் ஈரானிய எல்.பி.ஜி-யுடன் வந்த 'சீ பேர்டு' கப்பல், கடந்த ஏப்ரல் 2-ஆம் தேதி மங்களூர் துறைமுகத்தை வந்தடைந்து தற்போது சரக்குகளை இறக்கி வருவதாகத் தெரிவிக்கப்பட்டுள்ளது. இதன் மூலம் வரும் மாதங்களுக்கான இந்தியாவின் எரிசக்தித் தேவை முழுமையாக உறுதி செய்யப்பட்டுள்ளது.