புதிதாக கார் வாங்க திட்டமிட்டுக் கொண்டிருக்கும் வாடிக்கையாளர்களுக்கு ஒரு நற்செய்தி வெளியாகியுள்ளது. இந்தியாவின் முன்னணி வாகன தயாரிப்பு நிறுவனங்களான ஹூண்டாய், மாருதி சுசூகி மற்றும் டாடா மோட்டார்ஸ் ஆகிய நிறுவனங்கள் தங்களது முக்கிய மாடல் கார்களுக்கு ஜூன் 30 ஆம் தேதி வரை செல்லுபடியாகும் பிரத்யேக சிறப்புத் தள்ளுபடிகளை வாரி வழங்கியுள்ளன.
ஹூண்டாய் நிறுவனத்தின் சேமிப்புத் திட்டங்கள்
ஹூண்டாய் நிறுவனத்தின் கார்களை வாங்குபவர்களுக்கு இந்த மாதத்தில் கணிசமான தொகை மிச்சமாகும் வாய்ப்பு கிடைத்துள்ளது. இந்நிறுவனத்தின் மிகவும் பிரபலமான கிரெட்டா காரை வாங்குபவர்களுக்கு அதிகபட்சமாக ரூ.1.05 லட்சம் வரை சேமிப்புச் சலுகை கிடைக்கிறது. மேலும், கிராண்ட் ஐ10 நியாஸ் காரை வாங்குவோர் ரூ.80,000 வரையிலும், ஐ20 காரைத் தேர்ந்தெடுப்போர் ரூ.65,000 வரையிலும் சலுகைகளைப் பெற முடியும். இதுதவிர, ஹூண்டாய் வெர்னா மாடலுக்கு ரூ.55,000 வரையிலும் மற்றும் எக்ஸ்டர் மாடலுக்கு ரூ.40,000 வரையிலும் தள்ளுபடிகள் அறிவிக்கப்பட்டுள்ளன.
மாருதி சுசூகி கார்களில் மெகா தள்ளுபடி
மாருதி சுசூகி நிறுவனம் இந்த மாதத்தில் வாடிக்கையாளர்களைக் கவரும் வகையில் மிக பிரம்மாண்டமான தள்ளுபடியை அறிவித்துள்ளது. இந்நிறுவனத்தின் பிரீமியம் மாடலான இன்விக்டோ காரை வாங்குபவர்களுக்கு இந்த மாதத்தின் உச்சபட்ச சலுகையாக ரூ.2.15 லட்சம் வரை தள்ளுபடி வழங்கப்படுகிறது. அதனைத் தொடர்ந்து, கிராண்ட் விதாரா காரின் பெட்ரோல் மாடல்களுக்கு ரூ.1.35 லட்சம் வரையிலும், அதன் அதிநவீன ஹைப்ரிட் மாடல்களுக்கு ரூ.1.85 லட்சம் வரையிலும் வாடிக்கையாளர்கள் பணத்தை சேமிக்க முடியும். மேலும், மாருதியின் இதர பிரபலமான மாடல்களான இக்னிஸ், பலேனோ, எக்ஸ்எல்6 மற்றும் ஜிம்னி ஆகிய கார்களுக்கு ரூ.40,000 முதல் ரூ.45,000 வரை சிறப்பான சலுகைகள் அனௌன்ஸ் செய்யப்பட்டுள்ளன.
டாடா மோட்டார்ஸின் அதிரடி விலைக்குறைப்பு
மற்றொரு முன்னணி நிறுவனமான டாடா மோட்டார்ஸும் வாடிக்கையாளர்களைத் தன்வசம் இழுக்கப் போட்டிப் போட்டுக்கொண்டு சலுகைகளை அறிவித்துள்ளது. இந்நிறுவனத்தின் பெரும்பாலான புதிய 2026 மாடல் கார்களுக்கு ரூ.55,000 வரை தள்ளுபடிகள் வழங்கப்படுகின்றன. குறிப்பாக, சந்தையில் நல்ல வரவேற்பைப் பெற்றுள்ள நெக்ஸான் மற்றும் கர்வ் ஆகிய மாடல்களை வாங்குவோருக்கு ரூ.55,000 வரை சேமிப்பு கிடைக்கும். அதேபோல, டாடாவின் கம்பீரமான ஹாரியர் மற்றும் சஃபாரி கார்களின் டீசல் மாடல்களைத் தேர்ந்தெடுக்கும் வாடிக்கையாளர்களுக்கு ரூ.45,000 வரை சிறப்புச் சலுகைகள் அறிவிக்கப்பட்டுள்ளன.