இன்றைய காலகட்டத்தில் பொதுமக்களிடையே தங்களின் எதிர்காலத்திற்காகப் பணத்தைச் சேமிப்பதிலும், அதனைப் பாதுகாப்பான முறையில் முதலீடு செய்வதிலும் அதிக விழிப்புணர்வு ஏற்பட்டுள்ளது. உழைத்துச் சம்பாதிக்கும் பணத்தை வீணாக்காமல், அரசின் உத்தரவாதத்துடன் கூடிய திட்டங்களில் முதலீடு செய்து லாபத்தை உயர்த்த பலரும் ஆர்வம் காட்டி வருகின்றனர். அந்த வகையில், முதலீட்டாளர்களுக்கு அதிகபட்சமாக 8.2 சதவீதம் வரை வட்டி விகிதங்களை வழங்கும் மத்திய அரசின் முக்கிய சேமிப்புத் திட்டங்கள் குறித்து இங்கே விரிவாகப் பார்ப்போம்.
பெண் குழந்தைகளுக்கான பொன்மகன் சேமிப்பு
மத்திய அரசால் பெண் குழந்தைகளின் எதிர்காலக் கல்வி மற்றும் திருமணச் செலவுகளுக்காகச் சிறப்பாகச் செயல்படுத்தப்பட்டு வரும் திட்டம் சுகன்யா சம்ரித்தி யோஜனா ஆகும். செல்வ மகள் சேமிப்புத் திட்டம் என்று அழைக்கப்படும் இதில், ஆண்டுக்கு 8.2 சதவீதம் என்ற மிக உயர்ந்த வட்டி விகிதம் வழங்கப்படுகிறது. மற்ற முதலீடுகளை விட அதிக லாபம் தருவதால், பெண் குழந்தைகளை வைத்திருக்கும் பெற்றோர்களுக்கு இது ஒரு மிகச்சிறந்த முதலீட்டு வாய்ப்பாகக் கருதப்படுகிறது.
பாதுகாப்பான முதலீட்டிற்குத் தேசிய சேமிப்புச் சான்றிதழ்
அதிக ஆபத்து இல்லாத, அதேசமயம் உறுதியான லாபம் தரக்கூடிய ஒரு திட்டத்தை எதிர்பார்ப்பவர்களுக்குத் தேசிய சேமிப்புச் சான்றிதழ் (NSC) சிறந்த தேர்வாகும். இந்தத் திட்டத்திற்கு ஆண்டுக்கு 7.7 சதவீதம் வட்டி வழங்கப்படுகிறது. இதில் குறைந்தபட்சமாக 1,000 ரூபாயிலிருந்தே முதலீட்டைத் தொடங்க முடியும் என்பது நடுத்தர வர்க்கத்தினருக்குப் பெரும் வசதியாக உள்ளது.
முதலீட்டை இரட்டிப்பாக்கும் கிசான் விகாஸ் பத்ரா
சாமானிய மக்களின் சேமிப்புத் தேவையைப் பூர்த்தி செய்யும் நோக்கில் கொண்டுவரப்பட்டதுதான் கிசான் விகாஸ் பத்ரா திட்டம். இதில் முதலீடு செய்யப்படும் தொகையானது ஒரு குறிப்பிட்ட காலத்தில் இரண்டு மடங்காக உயரும் என்பது இதன் சிறப்பம்சமாகும். ஆண்டுக்கு 7.5 சதவீதம் வட்டி விகிதம் கொண்ட இத்திட்டத்தில், வெறும் 1,000 ரூபாய் செலுத்தி சேமிப்பைத் தொடங்கலாம். பணத்தை இரட்டிப்பாக்க விரும்புவோருக்கு இது உகந்த திட்டமாகும்.
மூத்த குடிமக்களுக்கான பிரத்யேகத் திட்டம்
ஓய்வு பெற்ற முதியவர்கள் தங்களின் சேமிப்புப் பணத்தைப் பாதுகாப்பாக முதலீடு செய்து அதிக வட்டி பெற மூத்த குடிமக்கள் சேமிப்புத் திட்டம் (SCSS) உதவுகிறது. இத்திட்டத்திற்கும் ஆண்டுக்கு 8.2 சதவீதம் என்ற கவர்ச்சிகரமான வட்டி விகிதம் வழங்கப்படுகிறது. வெறும் 1,000 ரூபாயிலிருந்து முதலீட்டை அனுமதிக்கும் இத்திட்டம், முதியவர்களின் பிற்காலத் தேவைகளுக்குத் தாராளமான லாபத்தை உறுதி செய்கிறது.