இந்திய ராணுவத்தின் வலிமையைக் கூட்டும் வகையில், அதானி குழுமத்தின் 'அதானி டிஃபென்ஸ் & ஏரோஸ்பேஸ்' நிறுவனம் தயாரித்துள்ள ‘பிரஹார்’ (Prhar) இலகுரக இயந்திர துப்பாக்கிகளின் (Light Machine Guns - LMG) முதல் தொகுப்பு அதிகாரப்பூர்வமாக ஒப்படைக்கப்பட்டுள்ளது. மத்திய அரசின் ‘மேக் இன் இந்தியா’ திட்டத்தின் கீழ், ராணுவத்திற்குத் தேவையான ஆயுதங்களை உள்நாட்டிலேயே தயாரிக்கும் தன்னிறைவு இலக்கை எட்டும் நோக்கில் இந்த முயற்சி மேற்கொள்ளப்பட்டுள்ளது.
அதன்படி, 7.62 மி.மீ திறன் கொண்ட 2,000 இலகுரக இயந்திர துப்பாக்கிகள் முதற்கட்டமாகத் தயாரிக்கப்பட்டுள்ளன. மத்தியப் பிரதேச மாநிலம், குவாலியர் புறநகர்ப் பகுதியில் உள்ள அதானி டிஃபென்ஸ் நிறுவன வளாகத்தில் நடைபெற்ற சிறப்பு நிகழ்ச்சியில், இவை இந்திய ராணுவத்திடம் ஒப்படைக்கப்பட்டன. இந்த விழாவில் ராணுவ அமைச்சகத்தின் கொள்முதல் பிரிவு தலைமை இயக்குநர் ஏ. அன்பரசு, நிறுவனத்தின் தலைமை நிர்வாக அதிகாரி ஆஷிஷ் ராஜவன்ஷி உள்ளிட்ட உயர் அதிகாரிகள் பங்கேற்றனர்.
துப்பாக்கிகள் ஒப்படைக்கப்பட்டதைத் தொடர்ந்து, அவை ராணுவ சரக்கு வாகனங்களில் அணிவகுப்பாக எடுத்துச் செல்லப்பட்டன. இந்த அணிவகுப்பை அதிகாரி ஏ. அன்பரசு கொடியசைத்துத் தொடங்கி வைத்தார். பின்னர் செய்தியாளர்களிடம் பேசிய ஆஷிஷ் ராஜவன்ஷி, “ஒப்பந்தத்தில் குறிப்பிடப்பட்ட காலத்திற்கு 11 மாதங்களுக்கு முன்பாகவே இந்த முதல் தொகுப்பை வழங்கியுள்ளோம். அடுத்த மூன்று ஆண்டுகளில் ஒப்பந்தப்படி முழுமையான எண்ணிக்கையிலான துப்பாக்கிகளும் ராணுவத்திடம் ஒப்படைக்கப்படும்,” என்று பெருமிதத்துடன் தெரிவித்தார்.
பாதுகாப்புத் துறையில் இந்தியா தன்னிறைவு பெறுவதை நோக்கிய ஒரு முக்கிய முன்னேற்றமாக இந்த நடவடிக்கை பார்க்கப்படுகிறது.